Islam dininiń negizine úńilsek, dindi jetkizýde áıel adamnyń orny erekshe bolǵan. Onyń jarqyn mysaly – múminderdiń anasy Aısha (r.a.). Ol kisi bilim tereńdigimen tanylyp, kóptegen er sahabalar dinı máseleler boıynsha odan keńes alyp, suraqtaryna jaýap izdegen.

Sol sekildi búgingi qoǵamda da áıeldiń bilimdi bolýy – asa mańyzdy. Sebebi áıel – urpaqtyń tárbıeshisi. Bala eń aldymen anadan tálim alady. Anasy bilimdi, kórgendi, salıqaly bolsa, bul qasıetter bala boıynda da kórinis tabady.

Qazaqta «Alla er adamǵa nesibesin shashyp bergen, al áıel adamǵa úıip bergen» degen sóz bar. Er adam syrtta júrip, sol nesibesin jıyp, otbasyna ákelse, áıel adam sol berekeni uıytyp, shańyraqtyń shyraǵyn jaǵady.

Tarıhymyzda da bilimdi, dana, batyr analarymyz az bolmaǵan: Zere ana, Domalaq ana – aqyly men parasatynyń úlgisi bolsa, Álıa men Mánshúk – batyrlyqtyń sımvoly.

Islamda qyz bala – ákesine jumaqtyń esigi, jubaıyna – ımannyń tolyqtaýshysy, al ana retinde – aıaǵynyń astynda jumaq bar tulǵa.