Búgin Túrkistanǵa Ulybritaniianyń Qazaqstandaǵy Elshisi Keti Lich pen Halyqaralyq Kóshi-qon uiymy missiiasynyń basshysy Serhan Aktoprak keldi. Oblys ákimi Darhan Satybaldy óńirge kelgen qonaqtarmen kezdesip, birqatar máseleni jan-jaqty talqylady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Sizderdi Túrkistan tórinde kórgenime qýanyshtymyn! Kieli óńirimizge qosh keldińizder! Bizdiń oblystyń turǵyndary rasynda óte eńbekqor. Qai jerge barmasyn, top jaryp shyǵady. Ózderińiz bilesizder, Túrkistan óńirinde halyq tyǵyz ornalasqan. Onyń ishinde 80 paiyzdan astamy aýylda turady. Bul – elimizdegi oblystar arasynda eń joǵary kórsetkish jáne óńirimiz aýyl sharýashylyǵy baǵytynda kósh bastap tur. Oblysymyzdyń ekonomikalyq-áleýmettik kórsetkishteri de, týristik áleýeti de jaqsaryp keledi.
Búgin ashylǵaly otyrǵan ortalyqtyń jumyssyzdyqty azaitýǵa úlesi zor deýge bolady. Qazaqstan eńbekshi kóship-qonýshylardyń quqyqtary men ál-aýqatyn jaqsartýǵa, qorǵaýǵa, olardy kóshi-qonnyń neǵurlym qaýipsiz jáne nátijeli tájiribesi úshin qajetti bilimdermen jáne resýrstarmen qamtamasyz etýge mindettenedi. Eńbek mobildiligi ortalyǵynyń bilikti qyzmetkerleri migranttarǵa ómirlik mańyzdy aqparat bere otyryp, ortalyqtandyrylǵan torap retinde áreket etedi dep senemin, – dedi Darhan Satybaldy.
HKU Ulybritaniia úkimetiniń qarjylyq qoldaýymen eńbek mobildiligi ortalyǵyna áleýetti arttyrýǵa kómek kórsetedi. Osyǵan toqtalǵan Ulybritaniianyń Qazaqstandaǵy Elshisi Keti Túrkistan óńiriniń áleýetine joǵary baǵasyn berdi. Atalǵan ortalyq Ulybritaniiaǵa jumys isteýge niet etken turǵyndarǵa jan-jaqty kómek kórsetetinin jetkizdi.
Al Qazaqstandaǵy HKU missiiasynyń basshysy, Ortalyq Aziia boiynsha úilestirýshisi Serhan Aktoprak mundai ortalyqtyń kóshi-qonǵa daiyndyq kezinde mańyzy zor ekenin aitty. Eńbekshi migranttardyń jańa ortaǵa tez beiimdelip, aldyn ala maǵlumat alatynyn atap ótti.
Aita keteiik, qonaqtar ári qarai shet elderdegi jumystarǵa jergilikti azamattardy joldaýǵa baǵyttalǵan «Aldyn ala daiarlyq ortalyǵyn» ashý saltanatynyń lentasyn qiiý rásimine qatysady. Sonymen qatar ortalyqtyń qyzmetimen tanysyp, shetelde jumys isteýge nietti azamattarmen pikir almasady. Túrkistandaǵy «Eńbek mobildiligi ortalyǵy» bazasynda ashylatyn ortalyq qazaqstandyq eńbekshi migranttarǵa konsýltatsiialyq qoldaý kórsetedi.
«Ortalyq Aziiadan Ulybritaniiaǵa maýsymdyq jumysshylardyń qaýipsiz kóshi-qony» jobalyq is-sharasy aiasynda «Eńbek mobildiligi ortalyǵynda» uiymdastyrylatyn baspasóz-konferentsiiasynan soń QR Prezidenti janyndaǵy memlekettik basqarý Akademiiasynyń Túrkistan oblysy boiynsha filialyna barady. Onda trenerlerdi daiarlaý protsesimen tanysyp, trenerlerdiń alǵashqy sessiiasyna qatysady. Sodan soń Q.A.Iasaýi kesenesi men shahardaǵy týristik oryndardy aralamaq.
