Almaty qalasynyń ákimi Darhan Satybaldy Almaly aýdanynda kóshpeli jiyn ótkizip, oǵan aýdan basshylyǵy, salalyq basqarma ókilderi, kommýnaldyq qyzmetter men tiisti uiymdar qatysty,- dep habarlaidy Dalanews.kz
Almaly aýdanynyń ákimi Arman Shamshin aýdannyń negizgi máselelerin atap ótip, shuǵyl sheshimdi qajet etetin túitkildi tustarǵa toqtaldy. Onyń aitýynsha, eń ózekti másele apattyq jaǵdailar men jóndeý jumystarynyń kesirinen paida bolǵan qazylǵan jerlerdiń kóptigi. Búginde aýdanda osyndai 325 ýchaske tirkelgen. Olardyń deni «Alataý Jaryq Kompaniiasy» AQ, «Almaty Sý» MKK jáne «Almaty jylý júiesi» JShS-na tiesili. Qalanyń injenerlik jelileri ábden eskirgen, al qazylǵan jerlerdi qalpyna keltirý jumystary uzaqqa sozylyp jatyr.
Darhan Satybaldy kóshe boiyndaǵy qazba jumystary aiaqtalǵan soń jerdi qalpyna keltirý qarqynyna kóńili tolmaitynyn aityp, barlyq jumysty 1 qyrkúiekke deiin bitirýdi tapsyrdy. Ásirese, «AlJJ» JShS-na jylytý maýsymy bastalǵanǵa deiin barlyq aýmaqty tolyq qalpyna keltirý mindetteldi.
Jiyn barysynda «Taza Qazaqstan» ulttyq baǵdarlamasy aiasynda kóshe jaryǵyn ornatý, qalany tazartý jáne kóriktendirý jaiy da sóz boldy. Qala ákimi merdiger uiymdardyń jumysyna syn aitty.
«Bizde barlyq jaǵdai jasalǵan, júie bar, qarjy qarastyrylǵan, merdigerler de tańdalǵan. Ókinishke qarai, nátije kóńilden shyqpai tur. Merdigerler jaýapkershiligin sezinýge tiis, biýdjetten bólingen ár tiyn tek maqsatqa sai jumsalýy kerek», — dedi qala ákimi.
Sondai-aq, shahar basshysy «Halyq qatysatyn biýdjet» baǵdarlamasy arqyly júzege asyrylǵan jobalardyń sapasyna da kóńili tolmaitynyn jetkizdi. Mysaly, 2023 jyly turǵyndardyń bastamasymen salynǵan keibir shaǵyn skverler men demalys oryndary sapasyz bolyp shyqqan: otyrǵyzylǵan aǵashtar qýrap qalǵan, abattandyrý tez tozyp ketken.
«Qalanyń kórkin jańartyp, kelbetin kórkeitýimiz kerek. Aýla men kósheden bastap, jaiaý júrginshi joly men jol tósemine deiin uqyptylyq pen jańashyldyq qajet», — dedi qala basshysy.
Jiyn sońynda Darhan Satybaldy abattandyrý jumystaryn uiymdastyrý tásilderin qaita qarap, jergilikti ákimdikterdiń jumysyn úilesimdi ári tiimdi etý qajettigin atap ótti. Endigi jerde barlyq kezeńde baqylaý kúsheitilip, merdigerlermen jáne qyzmet kórsetýshi uiymdarmen ózara is-qimyldyń tiimdi júiesi qurylmaq.
Kóshpeli jiyn barysynda Almaly aýdany turǵyndardy qabyldaý ótti. Turǵyndar turǵyn úilerdiń sapasy men paidalanylýy, aýlalardy abattandyrý, infraqurylym, kommýnaldyq qyzmetter jáne qoǵamdyq qaýipsizdikke qatysty máseleler kóterdi. Ásirese, «Arbat», «Nomad-2» jáne «Status» turǵyn úi keshenderindegi qurylys kompaniialarynyń ýádelerin oryndamaýy, Muqanov kóshesine qonaqúi salý jospary men politsiia tirek pýnktin halyq tyǵyz qonystanǵan aýdanǵa kóshirý qajettigi qozǵaldy.
Óz kezeginde Darhan Satybaldy injenerlik jáne qurylys talaptaryna sai kelmeitin kemshilikter joiylmaiynsha, jelilerdi qala balansyna qabyldaý múmkin emes ekenin aitty. Al turǵyn úilerdi kútip ustaý máselesi basqarýshy kompaniialar arqyly nemese sot tártibimen sheshilýge tiis ekenin túsindirdi.
Turǵyndarǵa MIB qurý tártibi jáne qurylys kompaniialaryn túitkilderdi sheshýge tartý joldary túsindirildi. Árbir másele boiynsha naqty is-sharalar jospary men oryndalý merzimi belgilendi.
