Týrizm jáne sport ministri Erbol Myrzabosynovtyń qatysýymen Qazaqstan jeńil atletika federatsiiasynyń 2024 jyldy qorytyndylaý jiyny ótti. Is-sharaǵa jeńil atletika federatsiiasynyń prezidenti Danial Ahmetov, oblystyq federatsiianyń basshylary, sportshylar men federatsiia ókilderi qatysty.
Jiynda Danial Ahmetov federatsiianyń atqarǵan jumysy týraly esep berip, sporttaǵy birqatar mańyzdy jetistikterin atap ótti. Onyń ishinde, halyqaralyq jarystarda qazaqstandyq atletter kórsetken joǵary nátijeler men jeńister, sondai-aq jeńil atletikanyń damýyna baǵyttalǵan jańa bastamalar aityldy.
Otyrysta Danial Ahmetov óz qyzmetin merziminen buryn toqtatatynyn málimdep, federatsiia prezidenttigine dańqty jeńil atlet, London Olimpiadasynyń chempiony Olga Rypakovanyń kandidatýrasyn usyndy. Jiynǵa qatysýshylar, sonyń ishinde oblys federatsiialarynyń basshylyǵy men sport qaýymdastyǵy O.Rypakovanyń kandidatýrasyn biraýyzdan qoldady.
Ministr Erbol Myrzabosynov jeńil atletika federatsiiasyn birneshe jyl basqarǵan Danial Ahmetovke jemisti qyzmeti úshin alǵys bildirip, prezidenttikke taǵaiyndalǵan Olga Rypakovanyń qyzmetine sáttilik tiledi.
«Jeńil atletika – eldegi eń tanymal sport túrleriniń biri. Qazirgi tańda 360 myńnan astam otandasymyz dál osy sport túrimen kásibi túrde ainalysady. Sondyqtan biz bul sportty jańa deńgeige kóterip, onyń halyqaralyq arenada tanymaldylyǵyn arttyrýymyz qajet. Búgingi jiynda federatsiianyń jumysyna qatysty mańyzdy ózgerister bolyp jatyr. Federatsiiany birneshe jyl basqarǵan Danial Ahmetov qyzmetinen ketip jatyr. Oǵan atqarǵan jumysy úshin alǵys bildiremin. Danial Kenjetaiulynyń basshylyǵymen bizdiń atletter halyqaralyq jarystarda úlken jetistikterge jetti. Endi federatsiia prezidenttigine Olimpiada chempiony Olga Rypakova kelip otyr. Olga Sergeevnanyń otandyq jeńil atletikanyń damýyna qosqan úlesi mol. Aldaǵy ýaqytta da elimizdiń jeńil atletika sportyn biikterge kóteredi dep senemiz», - dep atap ótti Erbol Myrzabosynov.
Jiyn sońynda ministr Olga Rypakovaǵa elimizdegi jeńil atletika sportynyń halyqaralyq deńgeidegi yntymaqtastyǵyn arttyrý, sportshylardyń daiyndyǵyna jáne rezervti daiarlaýǵa erekshe kóńil bólý qajettigin tapsyrdy.
