تۋريزم جانە سپورت ءمينيسترى ەربول مىرزابوسىنوۆتىڭ قاتىسۋىمەن قازاقستان جەڭىل اتلەتيكا فەدەراسياسىنىڭ 2024 جىلدى قورىتىندىلاۋ جيىنى ءوتتى. ءىس-شاراعا جەڭىل اتلەتيكا فەدەراسياسىنىڭ پرەزيدەنتى دانيال احمەتوۆ، وبلىستىق فەدەراسيانىڭ باسشىلارى، سپورتشىلار مەن فەدەراسيا وكىلدەرى قاتىستى.
جيىندا دانيال احمەتوۆ فەدەراسيانىڭ اتقارعان جۇمىسى تۋرالى ەسەپ بەرىپ، سپورتتاعى ءبىرقاتار ماڭىزدى جەتىستىكتەرىن اتاپ ءوتتى. ونىڭ ىشىندە، حالىقارالىق جارىستاردا قازاقستاندىق اتلەتتەر كورسەتكەن جوعارى ناتيجەلەر مەن جەڭىستەر، سونداي-اق جەڭىل اتلەتيكانىڭ دامۋىنا باعىتتالعان جاڭا باستامالار ايتىلدى.
وتىرىستا دانيال احمەتوۆ ءوز قىزمەتىن مەرزىمىنەن بۇرىن توقتاتاتىنىن مالىمدەپ، فەدەراسيا پرەزيدەنتتىگىنە داڭقتى جەڭىل اتلەت، لوندون وليمپياداسىنىڭ چەمپيونى ولگا رىپاكوۆانىڭ كانديداتۋراسىن ۇسىندى. جيىنعا قاتىسۋشىلار، سونىڭ ىشىندە وبلىس فەدەراسيالارىنىڭ باسشىلىعى مەن سپورت قاۋىمداستىعى و.رىپاكوۆانىڭ كانديداتۋراسىن ءبىراۋىزدان قولدادى.
مينيستر ەربول مىرزابوسىنوۆ جەڭىل اتلەتيكا فەدەراسياسىن بىرنەشە جىل باسقارعان دانيال احمەتوۆكە جەمىستى قىزمەتى ءۇشىن العىس ءبىلدىرىپ، پرەزيدەنتتىككە تاعايىندالعان ولگا رىپاكوۆانىڭ قىزمەتىنە ساتتىلىك تىلەدى.
«جەڭىل اتلەتيكا – ەلدەگى ەڭ تانىمال سپورت تۇرلەرىنىڭ ءبىرى. قازىرگى تاڭدا 360 مىڭنان استام وتانداسىمىز ءدال وسى سپورت تۇرىمەن كاسىبي تۇردە اينالىسادى. سوندىقتان ءبىز بۇل سپورتتى جاڭا دەڭگەيگە كوتەرىپ، ونىڭ حالىقارالىق ارەنادا تانىمالدىلىعىن ارتتىرۋىمىز قاجەت. بۇگىنگى جيىندا فەدەراسيانىڭ جۇمىسىنا قاتىستى ماڭىزدى وزگەرىستەر بولىپ جاتىر. فەدەراسيانى بىرنەشە جىل باسقارعان دانيال احمەتوۆ قىزمەتىنەن كەتىپ جاتىر. وعان اتقارعان جۇمىسى ءۇشىن العىس بىلدىرەمىن. دانيال كەنجەتاي ۇلىنىڭ باسشىلىعىمەن ءبىزدىڭ اتلەتتەر حالىقارالىق جارىستاردا ۇلكەن جەتىستىكتەرگە جەتتى. ەندى فەدەراسيا پرەزيدەنتتىگىنە وليمپيادا چەمپيونى ولگا رىپاكوۆا كەلىپ وتىر. ولگا سەرگەيەۆنانىڭ وتاندىق جەڭىل اتلەتيكانىڭ دامۋىنا قوسقان ۇلەسى مول. الداعى ۋاقىتتا دا ەلىمىزدىڭ جەڭىل اتلەتيكا سپورتىن بيىكتەرگە كوتەرەدى دەپ سەنەمىز»، - دەپ اتاپ ءوتتى ەربول مىرزابوسىنوۆ.
جيىن سوڭىندا مينيستر ولگا رىپاكوۆاعا ەلىمىزدەگى جەڭىل اتلەتيكا سپورتىنىڭ حالىقارالىق دەڭگەيدەگى ىنتىماقتاستىعىن ارتتىرۋ، سپورتشىلاردىڭ دايىندىعىنا جانە رەزەرۆتى دايارلاۋعا ەرەكشە كوڭىل ءبولۋ قاجەتتىگىن تاپسىردى.
