Biyl «Jumyspen qamtýdyń jol kartasy – 2020» baǵdarlamasy aiasynda 30 jylda birinshi ret Katonqaraǵai aýdanynda jeti kópqabatty turǵyn úi salynyp jatyr. Osy maqsatta 200 million teńgeden astam qarajat bólinip, investorlar da tartylǵan. Nátijesinde birqatar kópbalaly januianyń baspana máselesi sheshiledi.
Qurylys jumystary aiasynda jańa jumys oryndary da ashylmaq. Aimaq basshysy Danial Ahmetovtiń aitýynsha, jyl sońyna deiin óńirdegi 562 kópbalaly otbasy turǵyn úimen qamtamasyz etiledi.
– Jalpy, óńirdegi turǵyn úi qurylysy jyl saiyn qarqyndy júrgizilýde. Merdigerlerdiń jumysyna baqylaý kúsheitildi. Osy jyly 77 úi qoldanysqa beriledi dep josparlanyp otyr. Qurylys 118 aýmaqta júrgizilýde. Bul alty jarym myń páterdi quraidy. Aldaǵy eki jylda 93 kópqabatty turǵyn úi salynbaq. Barlyq qarjy kózderin tartý arqyly 2020-2021 jyldary bir million sharshy metr turǵyn úi boi kóteredi. Mundai kórsetkish ShQO-da elimiz táýelsizdik alǵaly beri bolmaǵan, – dep habarlady oblystyq Aqparat ortalyǵy.
Óńirdegi eki iri qalada «Birqabatty Shyǵys» jobasy júzege asyrylýda. Otbasy turǵyn úidiń jobasyna qinalmai, bilik ókilderi usynǵan birneshe jobanyń bireýin tańdai alady. Bul turǵyn úi kezegindegilerdi azaitýǵa múmkindik beredi. Búginde óńirde jeke jáne kópqabatty turǵyn úiler salýǵa barlyq jaǵdai jasalǵan.
