Esterińizge sala keteıik, jylý qazandyǵynyń qurylysy 2011 jyldyń mamyr aıynda bastalǵan bolatyn. Josparǵa sáıkes nysan 2013 jyly qoldanysqa berilýi tıis edi. Alaıda jobany iske qosý jumystary barysynda qıyndyqtar týyndaǵan bolatyn.
Budan bólek, 2016 jyly jobanyń bas qurylys merdigeri bolyp taǵaıyndalǵan. «Qurylys-montaj kásiporyny – Almaty» JSHS bankrotqa ushyrady. Jalpy aıtqanda, qurylys-montaj jumystary 71 paıyzǵa oryndalǵan. Osy kúnge deıin aýyl turǵyndary 1965 jyly salynǵan eski qazandyqty paıdalanyp keldi.
Qazandyq mazýtpen jumys isteıdi. Danıal Ahmetovtiń aıtýynsha, sonyń saldarynan memleket qazynasy aıtarlyqtaı shyǵynǵa shekken. Sebebi jylý qazandyǵynyń ksplýatasıasyna jyl saıyn 500 mıllıon teńge jumsalǵan. Soǵan qaramastan úıdegi jylý talapqa sáıkes kelmegen.
Aǵymdaǵy jyl basynda komısıa qurylyp, qurylysy bitpegen nysanda tehnıkalyq zertteý júrgizilgen. Sóıtip, shilde aıynda bul jumysqa «Azıa Energo Proekt Montaj» JSHS jańa merdiger bolyp taǵaıyndaldy.
Kompanıa túzetýler engizip, jobadaǵy qatelerdi jóndep, jylý qazandyǵynyń qurylysyn aıaqtady. Qazir nysandy iske qosý jumystary júrgizilýde.
– Birneshe kúnnen keıin jańa jylý qazandyǵy qoldanysqa beriledi. Osylaısha, qanshama jyldan beri turǵyndardyń alańdatyp kelgen másele sheshimin tapty. 10 qazannan bastap aýyldaǵy barlyq úıge jylý beriledi, – dedi Danıal Ahmetov.
Aıta keteıik, Shýaq kentinde 500-ge jýyq otbasy turady. Onda 9 kópqabatty turǵyn úı bar. Qylmystyq-túzeý mekemesinde ulttyq gvardıashylardy qosqanda 550 adam jumys isteıdi.
