Naýryzdyń basynan beri Aiagózde 143 turǵyn-úidi sý shaiǵan. Arnaiy komissiia ókilderiniń sózine qaraǵanda bulardyń 18 -i qirap qalǵan, 52-i jóndeýge jaramaidy, al ózge 73-in qaita qalpyna keltirýge bolady.
Ázir 22 úidi jóndeý jumystary bastalyp ketti. Úilerin sý shaiyp baspanasyz qalǵan 52 otbasynyń 16-sy jańa úige kóship úlgergen. Budan syrt taǵy 18 otbasyǵa baspana alý úshin qujat daiyndaý jumystary júrýde.
Shyǵys Qazaqstan oblysynyń ákimi Danial Ahmetov atap ótkendei aldaǵy 3-4 kúnde bul otbasylar da turǵyn úimen qamtamasyz etilmek.
– Osy aptanyń aiaǵyna deiin tasqynnan zardap shekken 34 otbasy jańa baspanaǵa kóshedi. Bul úilerdiń sapasy bólek. Irgetasy berik. Burynǵymen salystyrǵanda áldeqaida eńseli. Al ózge 18 úige qatysty saýal týyndap tur. Bulardy komissiia tekseredi", – deidi Ahmetov.
Ázir oblys ákiminiń orynbasary Serik Aqtanov bastaǵan jumys komissiiasy jańadan salynǵan úilerdiń ishi-syrtyn tekserýde.
Zardap shekkenderge úi alý úshin barlyǵy 200 mln. teńgeden asa qarjy bólingen. Munyń 80 milliony oblys ákiminiń qorynan, 42,3 milliony aýdan ákiminiń qorynan, al qalǵan 100 million "Paryz" qorynan bólingen.
Aita ketsek, qazirgi tańda tasqynnan qutqarylǵan 515 adamnyń 408-i óz úilerine oraldy.
Aiagóz turǵyndary óz kezeginde tasqyn zardaptarymen naqty kúresip jatqan oblys ákiminiń kómegine dán riza.
