ناۋرىزدىڭ باسىنان بەرى اياگوزدە 143 ءتۇرعىن-ۇيدى سۋ شايعان. ارنايى كوميسسيا وكىلدەرىنىڭ سوزىنە قاراعاندا بۇلاردىڭ 18 ء-ى قيراپ قالعان، 52ء-ى جوندەۋگە جارامايدى، ال وزگە 73ء-ىن قايتا قالپىنا كەلتىرۋگە بولادى.
ءازىر 22 ءۇيدى جوندەۋ جۇمىستارى باستالىپ كەتتى. ۇيلەرىن سۋ شايىپ باسپاناسىز قالعان 52 وتباسىنىڭ 16-سى جاڭا ۇيگە كوشىپ ۇلگەرگەن. بۇدان سىرت تاعى 18 وتباسىعا باسپانا الۋ ءۇشىن قۇجات دايىنداۋ جۇمىستارى جۇرۋدە.
شىعىس قازاقستان وبلىسىنىڭ اكىمى دانيال احمەتوۆ اتاپ وتكەندەي الداعى 3-4 كۇندە بۇل وتباسىلار دا تۇرعىن ۇيمەن قامتاماسىز ەتىلمەك.
– وسى اپتانىڭ اياعىنا دەيىن تاسقىننان زارداپ شەككەن 34 وتباسى جاڭا باسپاناعا كوشەدى. بۇل ۇيلەردىڭ ساپاسى بولەك. ىرگەتاسى بەرىك. بۇرىنعىمەن سالىستىرعاندا الدەقايدا ەڭسەلى. ال وزگە 18 ۇيگە قاتىستى ساۋال تۋىنداپ تۇر. بۇلاردى كوميسسيا تەكسەرەدى"، – دەيدى احمەتوۆ.
ءازىر وبلىس اكىمىنىڭ ورىنباسارى سەرىك اقتانوۆ باستاعان جۇمىس كوميسسياسى جاڭادان سالىنعان ۇيلەردىڭ ءىشى-سىرتىن تەكسەرۋدە.
زارداپ شەككەندەرگە ءۇي الۋ ءۇشىن بارلىعى 200 ملن. تەڭگەدەن اسا قارجى بولىنگەن. مۇنىڭ 80 ميلليونى وبلىس اكىمىنىڭ قورىنان، 42،3 ميلليونى اۋدان اكىمىنىڭ قورىنان، ال قالعان 100 ميلليون "پارىز" قورىنان بولىنگەن.
ايتا كەتسەك، قازىرگى تاڭدا تاسقىننان قۇتقارىلعان 515 ادامنىڭ 408ء-ى ءوز ۇيلەرىنە ورالدى.
اياگوز تۇرعىندارى ءوز كەزەگىندە تاسقىن زارداپتارىمەن ناقتى كۇرەسىپ جاتقان وبلىس اكىمىنىڭ كومەگىنە ءدان ريزا.
