Dana Nurjigit: «Anammen áńgimemiz jaraspaidy»
«Anamnyń úiinde únemi «Asyl arna» qosýly turady. Ol kisiniń namazǵa jyǵylyp, oraza ustaǵanyna kóp jyl boldy. Almatydaǵy Jandosov pen Rozybakiev qiylysyndaǵy meshitte kúni-túni duǵa jasaidy, arab tiliniń sabaǵyna barady. 38 jasynda jesir qalǵan jalǵyz basty áieldiń ómirdegi tiregi osy bop tur. Biraq, meniń aitaiyn degenim bul emes. Kózben kórip otyrǵanym meni qatty alańdatady. «Asyl arna» da, meshittegi imamdar da shynaiy ómirden óte alshaq-aý...», – dep jazady jýrnalist.
Onyń aitýynsha, respýblika deńgeiinde terroristik qaýiptiń sary deńgeii jariialanǵanda, anasy bul týraly múlde beihabar bolyp shyqqan. Osy oraida halyqty sabyrǵa shaqyryp, dini saýatty ashýda arqa súieitin jalǵyz arna da «lám-lim» demegen. Osydan baryp BAQ ókili bir salada bite qainasqan áriptesteriniń jumysyn synǵa aldy.
«Asyl arnany» kórip otyryp baiqaimyn, olardyń baǵdarlamasy búgingi kúnniń talabyna sai emes. Aqtóbedegi oqiǵadan eshqandai sabaq almaǵan, etek jeńin jimaǵan. Habarlary sol kúiinshe, jaibyraqat, solyńqy kúide júrip jatyr. Al, menińshe, Aqtóbe oqiǵalarynan keiin bul arna búkil «setkasyn» qaita qarap, xabardaǵy ekpindi, nazardy nege aýdarý kerektigin jiti baqylap, memleket múddesin, qala berdi tynyshtyǵymyzdy qorǵaityn birden bir arna bolýǵa tiisti edi ǵoi», – dep kúiinedi telejúrgizýshi.
Osy oraida meshittegi imamdar úlken kisilerge de, jastarǵa da Quran súrelerin ǵana emes, sondai-aq bul memleket qazir qandai kezeńdi bastan ótkerip jatqanyn, túrli dini aǵymdardyń jeteginde ketip, qatelesken momyndardy jolǵa salý jóninde sóilesý kerek dep sanaidy ol.
«Anammen osy máselelerdi qozǵap tildeseiin desem, áńgimemiz múlde jaraspaidy. Ol kisi iá bul jaittardan xabarsyz, iá meshitterde tek qana musylman paryzy jaily áńgime bolady. Alańdaý, osy jaily oilaný, jaqyndarymen sóilesip, eń birinshi otbasyna berik bolý joq. Qudaiǵa qulshylyqty birinshi orynǵa qoiyp, qasyndaǵy jaqyndaryn kórmeýge shaqyra ma bilmeimin... Ómir bólek, din bólek. Úide de bólek adam bola bastadyq. Alańdaimyn...», – dep oiyn túiindedi D.Nurjigit.
