2025 jyly Qazaqstanda 20 jańa meshit paidalanýǵa berildi. Bul kórsetkish aldyńǵy jylmen salystyrǵanda 54 paiyz joǵary. Keiingi on jyldaǵy eń joǵary nátije osy jylǵa tiesili, dep habarlaidy Dalanews.kz.
Birinshi kredittik biýro málimetinshe, 2025 jyly el boiynsha barlyǵy 20 meshit iske qosylǵan. Sońǵy ret budan da joǵary kórsetkish 2015 jyly tirkelip, ol kezde 24 meshit paidalanýǵa berilgen. Bul derekter Strategiialyq josparlaý jáne reformalar agenttiginiń Ulttyq statistika biýrosyna silteme jasai otyryp keltirilgen.
Jinaqtalǵan tarihi derekter sońǵy jyldary meshit qurylysynyń qarqyn alǵanyn kórsetedi. Atap aitqanda, 2021–2025 jyldar aralyǵynda jyl saiyn salynǵan jańa meshitterdiń ortasha sany 17,4-ti quraǵan. Bul kórsetkish aldyńǵy besjyldyq kezeńmen salystyrǵanda shamamen eki ese kóp (8,8 meshit).
BKB sarapshylary ár jyldary salynǵan meshitterdiń syiymdylyǵyna qatysty ashyq derekter bolmaǵandyqtan, olardy tikelei salystyrý múmkin emes ekenin atap ótedi. Degenmen, qolda bar málimetter jańa ǵibadat oryndarynyń naqty quny arqyly janama taldaý jasaýǵa múmkindik beredi.
Biýro dereginshe, 2025 jyly meshit qurylysyna baǵyttalǵan qarjylandyrý kólemi nominaldy túrde úsh esege jýyq ósip, 12,6 mlrd teńgege jetken. Alaida bul rekordtyq kórsetkish emes. Máselen, 2022 jyly qarjylandyrý kólemi 118,8 mlrd teńgeni quraǵan. Onyń 97 paiyzy (114,9 mlrd teńge) elordaǵa tiesili bolyp, onda Ortalyq Aziiadaǵy eń iri meshit ashylǵan.
Qazirgi tańda paidalanýǵa berilgen meshitter sany men olardyń naqty quny boiynsha Qyzylorda oblysy alda keledi. Óńirde 11 meshit salynyp, oǵan 9,7 mlrd teńge jumsalǵan. Bul kórsetkish boiynsha oblys ekinshi jyl qatarynan kósh bastap otyr. Aita keteiik, 2021 jylǵa deiin bul óńirde meshit qurylysy is júzinde tirkelmegen.
2025 jyly Qyzylorda oblysynan bólek, meshitter Batys Qazaqstan, Aqtóbe, Jambyl jáne Aqmola oblystarynda da paidalanýǵa berilgen.
