Britandyq tanymal jýrnalist Endriý Nil Daily Mail basylymyndaǵy maqalasynda AQSh prezidenti Donald Tramptyń sońǵy ýaqytta fizikalyq jáne psihikalyq jaǵdaiy aitarlyqtai nasharlap bara jatqanyn jazdy. Onyń pikirinshe, bul Tramptyń kóptegen máselege, ásirese Iranǵa qatysty ustanymynyń jii ózgerýine áser etýi múmkin, dep habarlaidy dalanews.kz.
Jýrnalist Vashingtondaǵy saiasatkerler men prezidentti turaqty kórip júrgen adamdar arasynda Tramptyń densaýlyǵy jii talqylana bastaǵanyn aitady. Nildiń sózinshe, birneshe derekkózi prezidenttiń "kóz aldynda álsirep bara jatqanyn" jetkizgen.
Ol munyń bir ǵana sátsiz sóilegen sózine qatysty emes ekenin atap ótti. Jýrnalist birqatar belginiń qatar baiqalǵanyn jazdy. Olardyń arasynda qatty sharshaý, zeiin qoiý qabiletiniń tómendeýi, sóziniń shatasýy, jańylys sóileý, júrisiniń baiaýlaýy jáne syrtqy kelbetiniń ózgerýi atalady.
Nildiń málimetinshe, prezidenttiń ainalasyndaǵy adamdar oǵan túsetin júktemeni barynsha azaitýǵa tyrysyp júr. Kezdesýler sany qysqaryp, Tramptyń kestesinde tek mańyzdy is-sharalar qaldyrylǵan.
Jýrnalist prezident jaǵdaiynyń Iranmen qaqtyǵys bastalyp, jumys kólemi kúrt artqannan keiin nasharlaǵanyn alǵa tartady. Onyń aitýynsha, Tramp burynǵydan ashýshań ári agressivti bola túsken, al ainalasyndaǵylar buǵan qalai áreket etý kerektigin bilmei otyr.
Sonymen birge Endriý Nil qolynda meditsinalyq diagnoz nemese prezidenttiń densaýlyǵyna qatysty resmi qujat joq ekenin moiyndady. Ol tujyrymdaryn óziniń baqylaýlary men Vashingtondaǵy derekkózdermen sóilesýge súienip jasaǵan.
Maqala avtory Endriý Nil ońshyl-ortalyq kózqarastaǵy klassikalyq konservator sanalady. Ol buryn Trampty júieli túrde synaǵan jýrnalister qatarynda bolmaǵan, kerisinshe solshyl saiasatkerler men AQSh demokrattaryna jii syn aitqan. Sondyqtan maqalada avtordyń saiasi beitaraptyǵyna qatysty osy jait ta erekshe kórsetilgen.
Daily Mail jariialanymynan keiin Izraildiń Walla basylymy fizioterapevt Adam Djeimstiń málimdemelerin keltirdi. Ol Tramptan keiingi ýaqytta jaǵymsyz iis shyǵatyny týraly ózine anonimdi habarlama kelgenin aitqan. Djeims muny zár ustai almaý, júrek nemese búirek jetkiliksizdigimen bailanysty bolýy múmkin dep boljaǵan.
Alaida basylym bul málimetterdiń senimsiz ekenin eskertedi. Adam Djeims Trampty jeke teksermegen, onyń meditsinalyq qujattaryn kórmegen jáne aqparatty aty-jóni belgisiz adamnyń habarlamasynan alǵan.
Walla Djeimstiń buǵan deiin de dálelsiz boljam jasaǵanyn atap ótti. Ol bes ai buryn Tramptyń tórt ai ǵana ómiri qaldy dep málimdegen edi. Sondyqtan onyń zár ustai almaý, tamyr ishine dári qabyldaý, júrek nemese búirek jetkiliksizdigi týraly sózderin meditsinalyq aqparat emes, rastalmaǵan internet qaýeseti retinde qabyldaý qajet.
Endriý Nil óz maqalasynda Tramptan jaǵymsyz iis shyǵatynyn, onyń jaialyq qoldanatynyn nemese búirek jetkiliksizdigine shaldyqqanyn aitpaǵan. Degenmen keiingi aptalarda keibir amerikalyq basylymdar prezidentpen kezdesken adamdarǵa silteme jasap, odan jaǵymsyz iis sezilgeni týraly jazǵan. Bul málimetter de resmi meditsinalyq derektermen rastalmaǵan.
Jaǵdaidyń bir ereksheligi — 2024 jylǵy sailaý naýqanynda Tramp pen respýblikalyqtar Djo Baidenniń jasy men densaýlyq jaǵdaiyn negizgi saiasi taqyryptardyń birine ainaldyrǵan edi.
Olar Baidenniń sózden jańylýyn, oiyn joǵaltyp alýyn, baiaý júrýin, kópshilik aldynda baǵdaryn joǵaltqandai kóringen sátterin jáne jumys qabiletiniń tómendeýin jii alǵa tartty.
2024 jylǵy maýsymda Baiden men Tramptyń debatynan keiin bul másele kúrdelene tústi. Aqyrynda Demokratiialyq partiia basshylyǵynyń qysymymen Baiden prezidenttik sailaýǵa qatysýdan bas tartty.
Endi arada birneshe jyl ótken soń, keibir sarapshylar dál osyndai suraqtardy Trampqa qatysty qoia bastady. Alaida mańyzdy aiyrmashylyq bar: Tramptyń kognitivtik qabiletiniń tómendegenin anyq kórsetetin kópshilik aldyndaǵy naqty epizodtar ázirge tirkelmegen. Onyń keibir is-sharalarda qalǵyp otyrǵan videolary mundai qorytyndy jasaýǵa jetkilikti dálel sanalmaidy.
