Elordada 9 shildeden bastap TMD men Ortalyq Azıadaǵy eń iri pop-mádenıet festıvali – Comic Con Astana-2025 bastalady. Bıylǵy shara 13 shildege deıin jalǵasady jáne oǵan 70 myńnan astam qonaq, onyń ishinde keminde 10 myń sheteldik týrıs qatysady,- dep habarlaıdy Dalanews.kz
Comic Con Astana ózin Ortalyq Azıadaǵy eń iri ári eń tanymal gık-festıval retinde tanytty. Bul – komıks, kıno, oıyn jáne pop-mádenıettiń jankúıerleri úshin kreatıv ındýstrıanyń aıtýly oqıǵasyna aınalǵan shara.
Festıvál el ishinde de, odan tys jerlerde de keń aýdıtorıany tartyp, týrısik baǵyttyń damýyna jáne elordanyń aýqymdy is-sharalar ortalyǵy retindegi bedelin nyǵaıtýǵa yqpal etedi. Ol Nú-Iork, San-Dıego jáne Dýbaıdaǵy Comic Con festıválderimen deńgeıles.
İs-shara eki iri alańda ótedi:
• «Barys Arenada» shoý-baǵdarlamalar, halyqaralyq kospleı baıqaýy ótedi, sondaı-aq basty sahnada avtograf-sessıalar, Q&A (suraq-jaýap) jáne hedlaınerlermen kezdesýler uıymdastyrylady.
• «Astana Arena» stadıonynda úlken kórme aımaǵy ashylady. Onda taqyryptyq stendter, brendtik ınstallásıalar, kishi sahna, oıyn alańy jáne Pop Asia aımaǵy ornalasady.
Bıyl festıválge úsh birdeı Gollıvýd juldyzy qatysady:
• Endı Serkıs – brıtan akteri men rejıseri, motion capture tehnologıasynyń novatory. Tanymal jobalary: «Saqınalar ámirshisi», «Maımyldar planetasy», «Juldyzdar soǵysy», «Betmen».
• Esaı Morales – 40 jyldyq karerasy bar Gollıvýd juldyzy («Ozark», «Tıtandar», «Múmkin emes mısıa», «La Bamba»).
• Skott Edkıns – akter jáne jekpe-jek óneriniń sheberi («Daýsyz» fılmder serıasy, «Djon Ýık 4», «Doktor Strendj», «Ip Man 4»).
Barlyq hedlaıner avtograf-sessıalarǵa, Q&A jáne baspasóz konferensıalaryna qatysady.
Festıvál aıasynda Qazaqstan men Ispanıa arasyndaǵy alǵashqy birlesken jobanyń – Netflix strımıng platformasyna arnalǵan «Peremırıe» (La Tregua) fılminiń tusaýkeseri ótedi. Týyndy QarLAG tarıhynyń qaıǵyly sátterin baıandaıdy. Fılm rejıseri Mıgel Anhel Vıvas («Qaǵaz úı») jáne prodúser Emılıo A. Pına (Premios Goya) festıválge keledi dep kútilýde.
Baǵdarlamanyń dástúrli bóligi – 15 mıllıon teńge júlde qory bar halyqaralyq kospleı baıqaýy. Qazylar quramynda: Iaá Han (AQSH), Cinderys (Fransıa), Ran Hime (Qyrǵyzstan), Frau Haku (Reseı), Ainaven Elf! (Qazaqstan), Danik (Qazaqstan), Midday of Siberia (Reseı) jáne basqa da tanymal kospleıerler.
Festıváldiń arnaıy qonaqtarynyń qatarynda Marmok, Qewbite, Anton Mıls, Johan, Eugene Sagaz, Nastá Djekson, Big Gleb, Metal Family avtorlary jáne basqa da juldyzdar bar.
Sonymen qatar, shara barysynda TEKKEN World Tour 2025 halyqaralyq týrnıriniń resmı kezeńi ótedi. Bul – «faıtıng» janryndaǵy Tekken 8 oıyny boıynsha jarys. 90-nan astam oıynshy reıtıńtik upaılar men 400 000 teńge júlde qory úshin baq synasady.
