Atyraý oblysynyń biligi «Teńizshevroil» kompaniiasyn Qazaqstandaǵy eń iri munai ken orny – Teńizde óndiristik qaldyqtardy tiisti ruqsatsyz ornalastyrdy dep aiyptap otyr, dep habarlaidy dalanews.kz.
Bloomberg agenttiginiń málimetinshe, Atyraý oblystyq Ekologiia departamenti shilde aiynda júrgizgen tekserý barysynda ken ornynda qaldyqtardy belgilengen limitten tys kólemde ornalastyrý faktilerin anyqtaǵan.
Alaida «Teńizshevroil» tekserý qorytyndylarymen kelispeidi. Kompaniia Ekologiialyq retteý jáne baqylaý komitetine shaǵym túsirip, nátijelerdi sotqa deiingi tártipte daýlap jatyr.
Osyǵan bailanysty shaǵym qaralyp bitkenge deiin investorǵa qandai da bir aiyppul salynbaidy. Kompaniia óz kezeginde barlyq áreketi qoldanystaǵy zańnamaǵa sai bolǵanyn jáne qaldyqtardy ornalastyrý boiynsha belgilengen talaptardy buzbaǵanyn málimdedi.
Sarapshylardyń pikirinshe, ekologiia departamentiniń narazylyǵy óndiristik kúkirtti saqtaý máselesine qatysty bolýy múmkin. Buǵan deiin dál osyndai aiyppen Qashaǵan ken ornyn igerip jatqan NCOC konsortsiýmyna 2,3 trillion teńge kóleminde aiyppul salynǵan edi.
Alaida halyqaralyq munai kompaniialary bul sheshimmen kelispei, aiyppuldy tóleýden bas tartýǵa tyrysyp jatyr. Tipti ExxonMobil men «QazMunaiGazdyń» Qashaǵannyń batys bóligin igerý jónindegi birlesken jobasynyń taǵdyryna da áser etýi múmkin degen boljamdar aitylýda.
Aita keteiik, «Teńizshevroil» buǵan deiin de osyndai daýǵa tap bolǵan. 2007 jyly kompaniia kúkirtti normadan tys kólemde saqtaǵany úshin 306 million AQSh dollary kóleminde aiyppul tólegen. Degenmen sol kezde de kompaniia ekologiialyq talaptardy buzdy degen aiyptaýlarmen kelispeitinin málimdegen.
