Taiaýda Caspian University bilim ordasynda «Qazaqstan men Qytai arasyndaǵy zańnamalyq suraqtardy sáikestendirý» degen taqyrypta halyqaralyq ǵylymi konferentsiia bolyp ótti. Sharaǵa Qytaidyń Sian transport ýniversitetiniń arnaiy ókilderi kelip, óz tájiribelerimen bólisti. Jiyndy ashqan Caspian University rektory Joldasbek Núsenov myrza Qazaqstan men Qytai arasyndaǵy saýda-ekonomikalyq jáne mádeni-rýhani bailanystyń joǵary deńgeide damyp kele jatqanyn tilge tiek etti.
Shyǵystaǵy kórshimiz Qytai qazir Qazaqstannyń basty strategiialyq áriptesi. Sondyqtan eki aradaǵy bailanysty jandandyryp, qos eldiń zańnamalary boiynsha týyndaityn suraqtardy birlesip sheship, ekonomikalyq daǵdarys qyspaqqa alǵan tusta saýda-ekonomikalyq bailanystarymyzdy jandandyrýdyń mańyzy zor. Osy rette Caspian University eki eldiń arasyndaǵy zańnama salasynda týyndaityn máselelerdi talqylap, birlesip sheshýge umtylýy óte oryndy.
– Qazirgi tańda Qazaqstan men Qytai arasynda ekonomikalyq bailanys joǵary deńgeide damyp keledi. Osy qarym-qatynastyń mańyzyn arttyryp, irgesin bekemdei túsý úshin bizder túrli sala boiynsha bailanystarymyzdy zań júzinde bekemdep, ózekte máselelerdi birlesip sheshýge kúsh salýǵa múddelimiz. Sondyqtan eki eldiń arasyndaǵy zańnamasyna qatysty máselelerdi birlesip talqylaýǵa arnaiy kelgen Sian transport ýniversitetiniń ókilderi alǵys aitamyn, – dedi Caspian University rektory Joldasbek Músilimuly.
Zań salasyna qatysty mundai mańyzdy jiynnyń Caspian University bilim ordasynda ótýiniń ózin zańdylyq dep qarastyrýǵa bolady. Sońǵy jyldary bilikti zańger mamandar daiyndaýda elimizdegi oqý oryndar arasynda top bastap kele jatqan ýniversitet, elimizdiń memleketaralyq bailanystarda múddemizdiń joǵary deńgeide qorǵaityn mamandar daiyndaý isine barynsha kúsh salyp, halyqaralyq bailanystaryn damytyp júrgeni bárimizge belgili.
Jiyn barysynda sóz alǵan qytailyq mamandar da Caspian University zań salasynda bilikti mamandar daiarlaityn bilim ordasy retinde moiyndaityndaryn aitty. Óz kezeginde sóz alǵan Sian transport ýniversitetiniń ǵylym jáne tehnologiialyq zertteýler departamenti direktorynyń orynbasary Jia Yihua myrza aldaǵy ýaqytta Caspian University aradaǵy bailanysty arttyryp, shákirtter almasatynyn alǵa tartty.
– Sian transport ýniversiteti Qytaidaǵy jetekshi 20 oqý orynnyń qataryna kiretin bedeldi oqý oryn. Bilim ordasynyń negizi 1896 jyly qalanǵan. Búginde bizder ekonomika, basqarý, meditsina, filologiia, tehnikalyq jáne injenerlik mamandyqtardy daiyndaýǵa barynsha kúsh salyp kelemiz. Sonymen qatar ádebiet, quqyq, filosofiia men pedagogika salalary boiynsha da joǵary bilikti mamandar daiarlaý isi jolǵa qoiylǵan, – dedi meiman.
Konferentsiia jumysy barysynda zań salasynyń jiligin shaǵyp, maiyn ishken eki eldiń bilikti mamandary stýdentter aldynda Qazaqstan men Qytaidyń investitsiialyq kelisim-sharttarynyń quqyqtyq qyrlaryna toqtalyp, tereń taldaý jasaǵanyn aita ketýimiz kerek. Jiyn barysynda Sian transport ýniversitetiniń ókilderi aradaǵy bailanysty jandandyrýǵa múddeli ekenderin bildirip, aldaǵy ýaqytta Caspian University 10 stýdentine Qytaida oqýǵa múmkindik beretin grantty tabys etti. Osylaisha qos ýniversitettiń ókilderi araqatynasty jandandyratyn mańyzdy qujatqa qol qoidy.
Nurlan ÁÝBÁKIR.
