Túrkistan oblysy, Saryaǵash aýdanynda bıdaı orý naýqany bastaldy. Osynaý naýqanǵa bilek sybana kirisken aýdan dıqandary jaıdary jazdyń ár sátin qalt jibermeı, astyq orý qarqynyn údete túsken, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Dál qazirgi tańda egistik alqaptarynda tizilgen kombaındar altyn astyqty ysyrap qylmaı, jınalǵan dándi qambaǵa quıý ústinde.

Aýdan dıqandary jyldaǵydaı bıyl da astyq orý naýqanynan zor úmit kútedi. Árıne buǵan memleketimizdiń sharýashylyqtarǵa jasaǵan jeńildikteri de sebep bolýda. Sonymen qatar olarǵa lızıń negizinde tehnıka berilgen.

Janar-jaǵarmaı, qajetti bólshektermen, mıneraldy tyńaıtqyshtarmen qamtamasyz etýde máselesi jyl saıyn jaqsaryp keledi.

Egin oraǵyn alǵashqylardyń biri bolyp bastaǵan Darbaza aýyldyq okrýgindegi dıqandar qazir altyn dándi jınap alý úshin tynbaı eńbektenýde. Egis alqabyndaǵy oraq naýqanyna 50 kombaın men 100-ge jýyq júk kóligi qatysýda.

Bıyl aýdan boıynsha barlyǵy 44,9 myń gektar jerge masaqty daqyldar egildi, onyń ishinde bıdaı – 33,4 myń gektar, arpa – 7 myń gektar, júgeri – 4,5 myń gektar.