2014 jyldan beri Biryńǵai jinaqtaýshy zeinetaqy qorynyń salymshylaryna 11,15 trln teńgeden astam taza investitsiialyq tabys esepteldi, dep habarlaidy dalanews.kz.
BJZQ málimetinshe, 2026 jylǵy 1 shildedegi jaǵdai boiynsha Ulttyq bank zeinetaqy aktivterin basqarý nátijesinde 2014 jylǵy 1 sáýirden beri alynǵan taza investitsiialyq tabys 11,15 trln teńgeden asty. Zeinetaqy tólemderin eskergende, onyń salymshylardyń jalpy jinaǵyndaǵy úlesi 41,4%-dy qurady.
Sońǵy 12 aidyń qorytyndysy boiynsha mindetti, mindetti kásiptik jáne erikti zeinetaqy jarnalary esebinen qalyptasqan aktivterden 2,51 trln teńgege jýyq investitsiialyq tabys esepteldi. Bul kezeńdegi kiristilik 10,29% bolǵan.
Al jumys berýshiniń mindetti zeinetaqy jarnalary esebinen qalyptasqan aktivter boiynsha sońǵy bir jyldaǵy investitsiialyq tabys 122,77 mlrd teńgeni, al kiristilik 16,84%-dy qurady.
BJZQ qysqa merzimdegi kiristilik kórsetkishteri aktivterdi basqarý tiimdiligin tolyq baǵalaýǵa múmkindik bermeitinin atap ótti. Sebebi baǵaly qaǵazdar men valiýta baǵamdarynyń qubylýy qysqa kezeńdegi nátijege áser etedi. Sondyqtan investitsiialyq tabysty uzaq merzim boiynsha baǵalaý oryndy sanalady.
Qordyń málimetine sáikes, 1998 jyly jinaqtaýshy zeinetaqy júiesi qurylǵannan beri 2026 jylǵy 1 shildege deiingi jiyntyq investitsiialyq kiristilik 1 109,05% bolsa, osy kezeńdegi infliatsiia 995,04% deńgeiinde qalyptasty.
Salymshylardyń mindetti jáne mindetti kásiptik zeinetaqy jarnalary boiynsha jinaqtarynyń 50%-yna deiin, al erikti jarnalar boiynsha 100%-yna deiingi qarajatty jeke investitsiialyq portfeldi basqarýshy kompaniialarǵa berý quqyǵy bar.
BJZQ investitsiialyq tabys týraly aqparatty salymshylar qordyń resmi saityndaǵy jeke kabinetten nemese mobildi qosymsha arqyly kóre alatynyn habarlady.
