Qarjy monitring agenttiginiń (QMA) Astana qalasy boiynsha departamenti prokýratýranyń úilestirýimen Sot saraptamalary ortalyǵynyń laýazymdy tulǵalary men merdiger uiym basshysyna qatysty 2 mlrd teńgeden astam biýdjet qarajatyn jymqyrý faktisi boiynsha sotqa deiingi tergeý isin tirkedi, dep habarlaidy Dalanews.kz.
"2023–2025 jyldarǵa arnalǵan nashaqorlyq pen esirtki biznesine qarsy kúres jónindegi keshendi jospar aiasynda sot-saraptama organdaryn materialdyq-tehnikalyq jabdyqtaý maqsatynda respýblikalyq biýdjetten 10,3 mlrd teńge bólindi.🪙Alaida, 2023–2024 jyldary Sot saraptamalary ortalyǵynyń laýazymdy tulǵalary múddeli toppen aldyn-ala kelisip, biýdjet ótinimin qalyptastyrý kezinde jalǵan kommertsiialyq usynystar usyný arqyly jabdyqtyń qunyn úsh ese arttyrǵan", delingen agenttik habarlamasynda.
Budan bólek, memlekettik satyp alý konkýrsy jariialanbai turyp, tehnikalyq sipattamalarda tek ózderi tanityn kompaniialar ǵana usyna alatyn jabdyqtar kórsetilgeni de naqtylanady.
"Múlikti tárkileý maqsatynda jalpy quny 148 mln teńgeden asatyn Almaty qalasyndaǵy 2 jer telimi, Astana qalasyndaǵy páter jáne BMW H6 men RAV 4 avtokólikterine tyiym salyndy. Sonymen qatar, bank esepshottaryndaǵy 1,6 milliard teńge, 367 myń AQSh dollary jáne 366 myń eýro somasyndaǵy kompaniianyń aqsha qarajaty buǵattaldy", - deidi agenttiktegiler.
Quqyqtyq saraptama ortalyǵynyń direktory, memlekettik satyp alý departamentiniń basshysy jáne JShS basshysy ustalyp, sot olardy 2 aiǵa qamaýda ustaý jóninde sheshim qabyldady.
Sotqa deiingi tergeý jalǵasýda.
