Oljas Bektenov biýdjet qarajaty maqsatty paidalanylýyn baqylaý tetikteri jáne tsifrlyq teńgeni engizý jóninde keńes ótkizdi, – dep habarlaidy Dalanews.kz.
Keńeste ulttyq tsifrlyq qarjy infraqurylymyn damytý, tsifrlyq teńge arqyly biýdjet qarajatyn jumsaýdyń qadaǵalanýyn jáne tiimdiligin arttyrýǵa baǵyttalǵan jobalardy iske asyrý baǵyty jáne aldaǵy josparlar qaraldy. Memleket qarajaty jumsalýyn qadaǵalaý maqsatynda 2024 jyly iske qosylǵan tsifrlyq teńgeni qoldanatyn pilottyq joba barysy talqylandy.
Sybailas jemqorlyqqa qarsy is-qimyl agenttiginiń tóraǵasy Ashat Jumaǵali tsifrlyq teńge jobasy sybailas jemqorlyqqa barynsha beiim salalarda synaqtan ótip jatqanyn aitty.
Búginde barlyǵy 250 mlrd-qa jýyq tsifrlyq teńge ainalymǵa engizilgen. Ázirleýshiler ár aqsha birligine biregei tsifrlyq belgilerdi bailanystyrýdy qarastyrady, bul qarajat bólinýden bastap tolyq igerilýine deiingi barlyq kezeńde qoldanylýyn baqylaýǵa múmkindik beredi. Bul ádistiń AÓK-tegi tiimdiligi Aqmola oblysyndaǵy sharýa qojalyqtarymen birge "Aýyl amanaty" baǵdarlamasyn iske asyrý barysynda qaralǵan. Arnaiy baǵdarlamalanǵan tsifrlyq teńge fermerlerdiń mal basyn satyp alýyna nesie berý kezinde paidalanyldy ári jalǵan mámileler múmkindigin joiyp, protsestiń tolyq ashyq ótýin qamtamasyz etti.
Sonymen qatar, tsifrlyq teńge bazasynda ákimshilendirý tiimdiligin arttyrý jáne QQS qaitarý rásimin jedeldetý úshin "Tsifrlyq QQS" pilottyq jobasy iske qosyldy.
Premer-ministr Ulttyq tsifrlyq qarjy infraqurylymynyń aýqymyn odan ári keńeitýdiń, sondai-aq, biýdjet qarajatyn birshama únemdeýdi qamtamasyz etetin tsifrlyq teńgeni neǵurlym keńinen paidalanýdyń mańyzy jóninde aitty.
"Memleket basshysy atap ótkendei, tsifrlyq teńge arqyly "aqshany tańbalaý jáne boiaý" biýdjet qarajatynyń jumsalýyn baqylaý tetigi bolýy múmkin. Jalpy Ulttyq bank qarjy júiesin tsifrlyq transformatsiialaý boiynsha basqa da múddeli memlekettik organdarmen birlesip, aýqymdy jumys atqaryp jatyr. Tsifrlyq teńgege keletin bolsaq, sizderdiń bastamalaryńyzdy qoldaimyn. Tsifrlyq teńgeni engizý jańa tehnologiialyq ahýaldy eskere otyryp, qarjylandyrý úderisterin ońtailandyrýǵa kómektesetinine nazar aýdarý qajet.
Biznes úderister de ózgerip, ashyq bolýy kerek. Kásipkerlerge qatysty mynadai qaǵidany ustanǵan jón: biýdjet aqshasymen jumys isteseńiz, ashyq bolyńyz. Ony qaida jumsaitynyńyzdy jáne jetkizýshiler men merdigerlerdiń tolyq tizbegin ashyp kórsetińiz. Sondai-aq, tsifrlyq teńgeniń pilottyq jobasyn keńeitý qajet",- dedi Oljas Bektenov.
Keńes qorytyndysy boiynsha Tsifrlyq damý, innovatsiialar jáne aeroǵarysh ónerkásibi, Qarjy, Ónerkásip jáne qurylys, Ulttyq ekonomika ministrlikteri jańa tsifrlyq quraldardy qoldanýdy retteitin zańnamaǵa túzetýlerdi pysyqtap, elektron aqshany baǵdarlamalaý ádisnamasyn ázirleidi.
