Kúni keshe, 12 naýryzda Astanada eks ministr Qýandyq Bishimbaevqa qatysty aldyn ala sot otyrysy taǵy ótti. Bishimbaevqa qatysty sot otyrysynda ne aityldy? Endi ne bolady? Dalanews.kz tilshisi sholý jasady.
Bishimbaev júzin kórsetpei otyryp alǵan
12 naýryzda ótken otyrysqa da BAQ ókilderi kirgizilmedi. Muny Astana qalasy boiynsha Sot ákimshiligi departamentiniń basshysy Eldos Jumaqsanov bylai dep túsindirdi:
"Sot zalyna kirgisi kelgender kirgizilmedi, bos oryndar boldy, biraq bireýge basymdyq berildi, bireýge berilmedi" dep jatyr. Qylmystyq ister jónindegi aýdanaralyq sotta tek bes sot otyrysy zaly bar ekenine toqtalyp ótkim keledi. Bul rette osy sotta bir mezgilde tórt qylmystyq is qaralyp jatyr. Sottalýshy retinde bir-birden 32 adam, endi birinde toǵyz adam, taǵy birinde segiz adam ótip jatyr. Tórtinshisi - Bishimbaevtyń isi, onda eki adam - sottalýshy. Sáikesinshe munda segiz, toǵyz nemese 32 adam syimaidy. Sondyqtan osy zal tańdaldy"
Bishimbaevtyń qorǵaýshylary sotta qandai málimdeme jasady?
Óz áieli Saltanat Núkenovany óltirdi dep aiyptalǵan eks-ministr Qýandyq Bishimbaevtyń qorǵaýshylary sottyń aldyn ala tyńdaýynda birneshe málimdeme jasady. Olardyń sózinshe, Saltanat Núkenovanyń ózi Bishimbaevty qyzǵanǵan.
Sonymen qatar, advokattardyń sózinshe, Bishimbaevtyń tarapynan Saltanatqa abiýz pen qatigezdik jasalmaǵan, bul shyndyqqa janaspaityn kórinedi. Eks-ministrdiń advokattary beinebaqylaý kameralarynyń jazbalary zańsyz alynǵandyqtan, ony isten alyp tastaý kerek dep esepteidi.
Olar, sondai-aq, BAU meiramhanasynda tergeý eksperimentin júrgizý qajet dep otyr, óitkeni "kýágerlerdiń bergen aiǵaqtary ártúrli" deidi. Qýandyq Bishimbaev ta, ekinshi sottalýshy Baqytjan Baijanov ta qorǵaýshylarynyń talap-aryzyn qoldaitynyn, eshqandai qarsylyǵy joq ekenin aitty. Al jábirlenýshi tarap Bishimbaevtyń advokattarynyń barlyq talap-aryzyn qanaǵattandyrmaýdy surady. Marqum Núkenovanyń taraby 99-bapty ("Adam óltirý") 104-bapqa ("Abaisyzda kisi óltirý") dep ózgertýge negiz joq ekenin aitty.
Saltanat 12-13 ret soqqy jegen
Saraptama barysynda marqum Saltanat Núkenovanyń basyna 12-13 ret soqqy jasalǵany anyqtaldy. Bul týraly Astanada ótip jatqan sotttyń aldyn ala tyńdaýynda prokýror Aijan Aimaǵanova aitty.
"Júrgizilgen saraptama nátijesinde adamnyń (Saltanat Núkenova – red.) dene jaraqaty saldarynan qaitys bolǵany anyqtaldy. Endi qandai abaisyzda kisi óltirý áreketi týraly aita alamyz?
Sarapshylar Saltanat Núkenovanyń basyna 12-13 soqqy tigenin kórsetip otyr. Qorǵaý tarapy videomaterialdardy qylmystyq is materialdarynan alyp tastaýdy surap otyr. Ol jerde Bishimbaevtyń Núkenovany uryp jatqany anyq kórsetilgen.
Is boiynsha 50 shaqty adamnan jaýap alyndy, olar tikelei nemese janama túrde Bishimbaevtyń Núkenovany maqsatty túrde urǵanyn aitty", - dedi Aijan Aimaǵanova.
Bishimbaevtyń isin alqabiler qaraityn boldy
Azamattyq nekedegi áieli Saltanat Núkenovany óltirdi dep aiyptalǵan burynǵy ulttyq ekonomika ministri Qýandyq Bishimbaevtyń isin alqabiler qaraidy. Bul týraly 12 naýryzda ótken aldyn ala tyńdaýda belgili boldy.
Basty sot otyrysy qashan ótedi?
Qýandyq Bishimbaevtyń isi boiynsha basty sot otyrysy 27 naýryzda saǵat 10.00-de ótedi. Sot otyrysy orys tilinde ótedi. Alqabilerge kandidat retinde 300 adam qatysady.
Endi Qýandyq Bishimbaevtyń taǵdyry alqabiler sotynyń qolynda. Buǵan deiin alqabiler astanalyq stýdent Erasyl Áýbákirovti óltirgender men prodiýser Baian Maqsatqyzynyń burynǵy kúieýi Baqytbek Esentaevqa qatysty sheshim shyǵarǵan.
