كۇنى كەشە، 12 ناۋرىزدا استانادا ەكس مينيستر قۋاندىق بيشىمبايەۆقا قاتىستى الدىن الا سوت وتىرىسى تاعى ءوتتى. بيشىمبايەۆقا قاتىستى سوت وتىرىسىندا نە ايتىلدى؟ ەندى نە بولادى؟ Dalanews.kz ءتىلشىسى شولۋ جاسادى.
بيشىمبايەۆ ءجۇزىن كورسەتپەي وتىرىپ العان
12 ناۋرىزدا وتكەن وتىرىسقا دا ب ا ق وكىلدەرى كىرگىزىلمەدى. مۇنى استانا قالاسى بويىنشا سوت اكىمشىلىگى دەپارتامەنتىنىڭ باسشىسى ەلدوس جۇماقسانوۆ بىلاي دەپ ءتۇسىندىردى:
"سوت زالىنا كىرگىسى كەلگەندەر كىرگىزىلمەدى، بوس ورىندار بولدى، ءبىراق بىرەۋگە باسىمدىق بەرىلدى، بىرەۋگە بەرىلمەدى" دەپ جاتىر. قىلمىستىق ىستەر جونىندەگى اۋدانارالىق سوتتا تەك بەس سوت وتىرىسى زالى بار ەكەنىنە توقتالىپ وتكىم كەلەدى. بۇل رەتتە وسى سوتتا ءبىر مەزگىلدە ءتورت قىلمىستىق ءىس قارالىپ جاتىر. سوتتالۋشى رەتىندە بىر-بىردەن 32 ادام، ەندى بىرىندە توعىز ادام، تاعى بىرىندە سەگىز ادام ءوتىپ جاتىر. ءتورتىنشىسى - بيشىمبايەۆتىڭ ءىسى، وندا ەكى ادام - سوتتالۋشى. سايكەسىنشە مۇندا سەگىز، توعىز نەمەسە 32 ادام سىيمايدى. سوندىقتان وسى زال تاڭدالدى"
بيشىمبايەۆتىڭ قورعاۋشىلارى سوتتا قانداي مالىمدەمە جاسادى؟
ءوز ايەلى سالتانات نۇكەنوۆانى ءولتىردى دەپ ايىپتالعان ەكس-مينيستر قۋاندىق بيشىمبايەۆتىڭ قورعاۋشىلارى سوتتىڭ الدىن الا تىڭداۋىندا بىرنەشە مالىمدەمە جاسادى. ولاردىڭ سوزىنشە، سالتانات نۇكەنوۆانىڭ ءوزى بيشىمبايەۆتى قىزعانعان.
سونىمەن قاتار، ادۆوكاتتاردىڭ سوزىنشە، بيشىمبايەۆتىڭ تاراپىنان سالتاناتقا ابيۋز پەن قاتىگەزدىك جاسالماعان، بۇل شىندىققا جاناسپايتىن كورىنەدى. ەكس-مينيستردىڭ ادۆوكاتتارى بەينەباقىلاۋ كامەرالارىنىڭ جازبالارى زاڭسىز الىنعاندىقتان، ونى ىستەن الىپ تاستاۋ كەرەك دەپ ەسەپتەيدى.
ولار، سونداي-اق، BAU مەيرامحاناسىندا تەرگەۋ ەكسپەريمەنتىن جۇرگىزۋ قاجەت دەپ وتىر، ويتكەنى "كۋاگەرلەردىڭ بەرگەن ايعاقتارى ءارتۇرلى" دەيدى. قۋاندىق بيشىمبايەۆ تا، ەكىنشى سوتتالۋشى باقىتجان بايجانوۆ تا قورعاۋشىلارىنىڭ تالاپ-ارىزىن قولدايتىنىن، ەشقانداي قارسىلىعى جوق ەكەنىن ايتتى. ال جابىرلەنۋشى تاراپ بيشىمبايەۆتىڭ ادۆوكاتتارىنىڭ بارلىق تالاپ-ارىزىن قاناعاتتاندىرماۋدى سۇرادى. مارقۇم نۇكەنوۆانىڭ تارابى 99-باپتى ("ادام ءولتىرۋ") 104-باپقا ("ابايسىزدا كىسى ءولتىرۋ") دەپ وزگەرتۋگە نەگىز جوق ەكەنىن ايتتى.
سالتانات 12-13 رەت سوققى جەگەن
ساراپتاما بارىسىندا مارقۇم سالتانات نۇكەنوۆانىڭ باسىنا 12-13 رەت سوققى جاسالعانى انىقتالدى. بۇل تۋرالى استانادا ءوتىپ جاتقان سوتتتىڭ الدىن الا تىڭداۋىندا پروكۋرور ايجان ايماعانوۆا ايتتى.
"جۇرگىزىلگەن ساراپتاما ناتيجەسىندە ادامنىڭ (سالتانات نۇكەنوۆا – رەد.) دەنە جاراقاتى سالدارىنان قايتىس بولعانى انىقتالدى. ەندى قانداي ابايسىزدا كىسى ءولتىرۋ ارەكەتى تۋرالى ايتا الامىز؟
ساراپشىلار سالتانات نۇكەنوۆانىڭ باسىنا 12-13 سوققى تيگەنىن كورسەتىپ وتىر. قورعاۋ تاراپى ۆيدەوماتەريالداردى قىلمىستىق ءىس ماتەريالدارىنان الىپ تاستاۋدى سۇراپ وتىر. ول جەردە بيشىمبايەۆتىڭ نۇكەنوۆانى ۇرىپ جاتقانى انىق كورسەتىلگەن.
ءىس بويىنشا 50 شاقتى ادامنان جاۋاپ الىندى، ولار تىكەلەي نەمەسە جاناما تۇردە بيشىمبايەۆتىڭ نۇكەنوۆانى ماقساتتى تۇردە ۇرعانىن ايتتى"، - دەدى ايجان ايماعانوۆا.
بيشىمبايەۆتىڭ ءىسىن القابيلەر قارايتىن بولدى
ازاماتتىق نەكەدەگى ايەلى سالتانات نۇكەنوۆانى ءولتىردى دەپ ايىپتالعان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ءىسىن القابيلەر قارايدى. بۇل تۋرالى 12 ناۋرىزدا وتكەن الدىن الا تىڭداۋدا بەلگىلى بولدى.
باستى سوت وتىرىسى قاشان وتەدى؟
قۋاندىق بيشىمبايەۆتىڭ ءىسى بويىنشا باستى سوت وتىرىسى 27 ناۋرىزدا ساعات 10.00-دە وتەدى. سوت وتىرىسى ورىس تىلىندە وتەدى. القابيلەرگە كانديدات رەتىندە 300 ادام قاتىسادى.
ەندى قۋاندىق بيشىمبايەۆتىڭ تاعدىرى القابيلەر سوتىنىڭ قولىندا. بۇعان دەيىن القابيلەر استانالىق ستۋدەنت ەراسىل اۋباكىروۆتى ولتىرگەندەر مەن پروديۋسەر بايان ماقسات قىزىنىڭ بۇرىنعى كۇيەۋى باقىتبەك ەسەنتايەۆقا قاتىستى شەشىم شىعارعان.
