Quqyq qorǵaýshy Tatiana Chernobil QazNews24 satirikalyq paraqshasynyń avtory Temirlan Ensebektiń isine qatysty pikir bildirdi, dep habarlaidy Dalanews.kz.
Aitýynsha, bul is — zań tártipsizdiginiń kórinisi.
“Qylmystyq kodekste arazdyqty qozdyrý týraly bap bar, biraq ony qoldanýda eshqandai tártip joq,” – dep jazdy Chernobil óz paraqshasynda.
Onyń aitýynsha, bul bap qoǵamdaǵy tártipti saqtaý nemese jekkórýshilik negizinde jasalatyn qylmystardan qorǵaý úshin emes, bilikke unamsyz azamattardy qýdalaý úshin paidalanylyp jatyr.
“Bul baptyń qoldanylýy birjaqty. Ol, ádette, qorǵaýǵa muqtaj toptardyń múddesine qarsy jumys isteidi,” – dedi quqyq qorǵaýshy.
Chernobil atap ótkendei, Temirlanǵa taǵylǵan aiyp onyń satirikalyq jariialanymynda qoldanylǵan ánge bailanysty.
“Temirlandy basqa avtordyń mazmuny kúmándi ánin satirikalyq jariialanymda qoldanǵany úshin aiyptap otyr. Al shaǵymdanýshyny ashýlandyrǵan – ánniń ózi. Biraq sottalaiyn dep jatqan – Temirlan. Bul ádiletsizdik emes pe?” – dep suraq qoiady ol.
Quqyq qorǵaýshynyń aitýynsha, Qylmystyq kodekstiń 174-baby ekstremistik bolyp sanalady, al sottalǵandarǵa qosymsha jazalar taǵaiyndaý tájiribesi keń taralǵan.
“Eger Temirlandy kináli dep tanysa, oǵan birneshe jyl boiy qoǵamdyq nemese jýrnalistik qyzmetpen ainalysýǵa tyiym salýy múmkin. Bul bilikke qarsy shyǵyp júrgen azamattarǵa arnalǵan arnaiy jaza siiaqty kórinedi,” – dedi Chernobil.
Sonymen qatar, quqyq qorǵaýshy ekstremistik baptar boiynsha sottalǵandardy “ekstremizm men terrorizmdi qarjylandyrýǵa qatysy bar uiymdar men adamdar” tizimine qosý máselesine toqtaldy. Bul tizimge engender ekonomikalyq blokadaǵa ushyraidy, olardyń banktik shottary buǵattalady, notariýstyń qyzmetterin paidalaný jáne qarjylyq operatsiialar júrgizý múmkindiginen aiyrylady.
Chernobil daýǵa sebep bolǵan án týraly da pikir bildirdi.
“Atalǵan án 2000 jyldardan beri bar. Ol alǵashynda tek qazaq tildi ortada taralǵan edi. Alaida Resei men Ýkraina arasyndaǵy soǵys bastalǵannan keiin orys tildi aýditoriia arasynda da keń taralyp, shovinistik mazmunymen jii synǵa ilikti. Degenmen, bul ánniń Qazaqstanda oryndalýyna resmi tyiym salynbaǵan, biraq ony paidalanǵandarǵa jaza qoldanyp jatyr,” – deidi ol.
Eske salaiyq, 18 qańtarda tanymal Qaznews24 satiralyq paraqshasynyń avtory Temirlan Eńsebek eki ai merzimge qamaýǵa alynǵan edi.
Belgili zańger Janar Balǵabaevanyń aitýynsha, Temirlan Eńsebektiń qamalýyna "Ioý, orystar" degen án túrtki bolǵan. Eńsebek bul ándi reseilik telejúrgizýshi Tina Kandelaki týraly postyna qosqan, ánde balaǵat sózder bar.
Ol 174-bap "Áleýmettik, ulttyq, rýlyq, násildik, taptyq nemese dini alaýyzdyqty qozdyrý" boiynsha aiyptalyp otyr. Temirlan Eńsebek 2 jyldan 7 jylǵa deiin bas bostandyǵynan aiyrylýy múmkin.
