Bıyl Túrkistan qalasynda 159 kóshege jóndeý jumystary júrgizilmek. Búgingi tańǵa deıin 44,6 shaqyrymdy quraıtyn 41 kóshege ortasha jóndeý jumystary júrgizilgen. 2024 jyly 47,1 shaqyrym jol retke keltirilip, qanaǵattanarlyq joldardyń úlesi 50,3%-ǵa jetken bolatyn. Atalǵan jumystar nátıjesinde 2025 jyldyń qorytyndysymen kórsetkishti 66,7%-ǵa jetkizý kózdelip otyr. Bul jaıynda Túrkistan qalasynyń ákimi Ázimbek Pazylbekuly brıfıńte málimdedi,- dep habarlaıdy Dalanews.kz
«Jalpy qalada ınfraqurylym salasynda oń ózgerister jeterlik. Búgingi tańda shahardyń káriz júıesimen qamtylý deńgeıi – 36,5 paıyz, al aýyz sýmen qamtylýy 100 paıyzdy qurady. Elektrmen qamtý – 99,5 paıyz, tabıǵı gazben qamtý – 98 paıyz deńgeıinde. Bul kórsetkishterdi jaqsarta túsý maqsatynda birqatar aýqymdy jumystar qolǵa alynýda» - dedi spıker.
Jyl basynan beri qalanyń jalpy óńirlik ónimi 159,5 mlrd teńgeni qurap, jan basyna shaqqanda 663,5 myń teńgege jetken. Ónerkásip salasynda 40 mlrd teńgeniń ónimi óndirilip, onyń ishinde óńdeý ónerkásibi – 25 mlrd teńge, qurylys jumystarynyń kólemi – 299,3 mlrd teńge, paıdalanýǵa berilgen turǵyn úı kólemi – 434,6 myń sharshy metrdi qurady. Saýda aınalymy 157,9 mlrd teńgege jetse, negizgi kapıtalǵa salynǵan ınvestısıalar kólemi 490 mlrd teńgeni qurady.
Sondaı-aq, shahardaǵy arnaıy ekonomıkalyq aımaqta 9 joba júzege asyrylyp jatyr. Bul jobalar nátıjesinde 2956 jańa jumys orny ashylady. Sonymen qatar, ındýstrıaldy aımaqta 23 joba iske asyrylyp, 961 adam jumyspen qamtyldy. Josparlanǵan jobalar aıasynda sheteldik jáne otandyq ınvestorlardyń qatysýymen iri kásiporyndar qurylýda.
2025 jyldyń alǵashqy bes aıynda Túrkistanǵa 1,1 mln týrıs kelgen. Sheteldik týrıser sany 23,2 myń adamdy qurady. Týrızm salasyna tartylǵan ınvestısıalar kólemi 61,9 mlrd teńgege jetti. Qalada «Qolónershiler qalashyǵy», «Kúltóbe qalashyǵy», akvaparki bar qonaq úı kesheni syndy týrısik nysandardyń qurylysy júrgizilýde.
Sonymen qatar, 2025 jyly 12 jańa mektep paıdalanýǵa berilip, 4 mektepte kúrdeli jóndeý, 7 mektepte aǵymdaǵy jóndeý jumystary júrgizilýde. Sonymen qatar, jeke ınvestısıa esebinen 27 myń turǵynǵa qyzmet kórsetetin emhana men ońaltý ortalyǵynyń qurylysy qyza túsken.
