Túrkistan oblysynda ziiankestermen kúres boiynsha 4 jedel shtab qurylyp, jumys kúshi jasaqtalǵan. Bul jumystar tikelei oblys ákimi Nuralhan Kósherovtiń baqylaýyna alynǵan, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Osy oraida, Túrkistan oblysy ákiminiń orynbasary Nurbol Turashbekov Arys qalasy, Qojatoǵai aýylyndaǵy jedel shtab quramymen kezdesip, daiyndyqty pysyqtady.
Jumysty úilestirý boiynsha seminar uiymdastyrylyp, oǵan aýdan, qala ákimderi men salaǵa jaýapty orynbasarlary, basqarma basshylary, aýyl ákimderi qatysty.
Seminar barysynda shegirtke dernásilderin anyqtaýdan bastap himiialyq óńdeýden soń tazalaýǵa deiingi jumys úlestirilip, mindettemeler bekitildi. Oblys ákiminiń orynbasary jaýapty tulǵalarǵa jumystardy asa jaýapkershilikpen ýaqytyly atqarýdy tapsyrdy.
Biyl shegirtkege qarsy himiialyq óńdeý oblystaǵy 9 aýdanda júrgizilmek. Mamandar shegirtke dernásilderiniń sáýir aiynyń alǵashqy 10 kúninde shyǵady dep boljam jasady. Jalpy, 1 mln gektarǵa jýyq jaiylym jer alqaptarynyń 15 myń gektardan bólingen kartasy ázirlenip, 65 aýmaqta jumysshy top jasaqtaldy.
Sonymen qatar aýdan, qala ákimdikteri tarapynan 980 anyqtaýshy tizimi bekitildi. Anyqtaýshylardy «Boljam ádistemelik ortalyǵy» arnaiy daiyndyqtan ótkizdi. Odan bólek, 65 jumysshy topqa jatyn oryndar daiyndalyp, himiialyq óńdeý eritindisin ázirleýge qajetti 206 sý kózi belgilendi. Anyqtaýshylardy tasymaldaýǵa 86 mikroavtobýs, sý jetkizýge 45 arnaiy avtokólik, janar-jaǵarmai jetkizýge 30 arnaiy avtokólik ázirlendi. Óńirdegi 2 990 jaiylym jer ielerine habarlama berildi. Olar da anyqtaý sharalaryna qatyspaq.
