Túrkistan oblysynyń ákimi Nuralhan Kósherovtiń tóraǵalyǵymen ótken aptalyq apparat májilisinde «Taza Qazaqstan» baǵdarlamasy aiasynda atqarylyp jatqan jumystar men josparlar baiandalyp, qys mezgilinde joldardaǵy qaýipsizdik pen joldardyń sapasy, jylytý maýsymynyń ótý barysy saralandy,-dep habarlaidy Dalanews.kz.
Aimaq basshysy tazalyq, abattandyrý jáne kógaldandyrý baǵytyndaǵy jumystardy jandandyrýdy, túsindirý jumystaryn kúsheitýdi tapsyrdy.
"Memleket basshysynyń bastamasymen qolǵa alynǵan baǵdarlamalardyń iske asýy qatań baqylaýda tur. Árbir isti asa jaýapkershilikpen oryndaý kerek. Ótken aptada 6 aýdandy aralap shyǵyp, tazalyǵyn da zerdeledik. Aldaǵy ýaqytta da turaqty túrde qadaǵalap turamyz. «Taza Qazaqstan» baǵdarlamasyn sapaly úilestire almaǵan basshylardyń jaýapkershiligi qaralady. Tártip pen jaýapkershilikti kúsheitip, ekologiialyq saýattylyqty kóterý qajet", – dedi Nuralhan Kósherov.
Túrkistan oblysy ákiminiń birinshi orynbasary Zulpyhar Joldasovtyń baiandaýynsha, qys mezgilinde joldardyń qaýipsizdigi men júris sapasy turaqty baqylaýda. Oblys aýmaǵyndaǵy 4669 shaqyrym jolǵa 145 arnaiy tehnika, 382 jumysshy tartylyp, 6 myń tekshe metrden astam qum men 4 myń tonnadan astam tuz qoldanyldy. Qosymsha tehnikalar men jumys kúshin jumyldyrý arqyly qiyn jaǵdailarda tez arada áreket etý sharalary qolǵa alyndy.
Biyl oblys aýmaǵynda «jasyl beldeý» qurý, eldi mekenderdi kógaldandyrý baǵytynda 1 257 700 túp aǵash otyrǵyzý kózdelýde. Onyń ishinde, kóktem mezgilinde 631100 túp jáne kúz mezgilinde 626 600 túp aǵash otyrǵyzý josparlanǵan. Aǵash otyrǵyzý jumystary aqpan aiynyń sońynda bastalmaq. Jalpy, óńirde Siriia rozasy, órik, tut, iva, ailant, qaraǵash, katalpa, qaratal, terek, shaǵan, úienki, arsha aǵashtaryn egý kózdelip otyr.
«Taza Qazaqstan» baǵdarlamasyn tiimdi iske asyrý boiynsha memlekettik kommýnaldyq kásiporyndarǵa qatty turmystyq qaldyqtardy jinaý jáne shyǵarý, sanitariialyq tazartý, abattandyrý jónindegi qyzmetti júzege asyrý quqyǵyn berý tapsyrmasy berilgen bolatyn. Tapsyrma aiasynda tiisti jumystar atqarylyp, nátijesinde, qaýipsiz qaldyqtardy jinaý boiynsha tolyq kelisim alyndy. Búgingi tańda 5 aýdan, qala ákimdikteri tarapynan Jarǵyǵa ózgerister engizilip, 8 aýdanda tirkeý jumystary júrgizilýde. Qalǵan aýdandarda bul jumystar endi bastalmaq.
Aita keteiik, óńirde «Taza Qazaqstan» platformasy sátti iske asyrylýda. Tazalyq jumystaryna qatysty ótinimder @TazaQazBot telegram-bot arqyly qabyldanyp, turǵyndarmen keri bailanys ornatylady. Búgingi kúnge platformaǵa 1 125 ótinim túsken. Onyń ishinde, 1 104 ótinim oryndalsa, 21 ótinim oryndalý barysynda.
Apparat májilisinde «Jaily mektep» jobasynyń júzege asyrylý barysy, kóktemgi dala jumystary men oryndaýshylyq tártip jónindegi esepter tyńdalyp, tiisti tapsyrmalar berildi.
