Taldyqorǵandy qaýipsiz, jaily jáne jasyl qala retinde damytý úshin 2025-2026 jyldardyń naqty josparlary jasalyp, qala biýdjeti 33 paiyzǵa ulǵaityldy. Bul týraly oblys ákimi Beibit Isabaev jýrnalisterge bergen suhbatynda aitty,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Óńir basshysy óz sózinde oblys ortalyǵyn damytýdyń basym baǵyttaryna toqtaldy. Bul rette qala turǵyndarynyń qaýipsizdigin qamtamasyz etý isi aldyńǵy orynda tur. Osy maqsatta qoǵamdyq tártipti qadaǵalaityn 585 beinekamera jáne jol qaýipsizdigin qamtamasyz etetin 136 «Sergek» kamerasyn ornatý mejelengen. «Smart Siti» formaty boiynsha qalanyń tirshiligin táýlik boiy baqylai alatyn sitýatsiialyq ortalyqty iske qosý josparda bar. Oǵan qosa kóshelerdi jaryqtandyrý da qolǵa alynady. Búgingi kúni qaladaǵy 640 kósheniń 420-synda ǵana, iaǵni, 65 paiyzyna jaryq ornatylǵan. Osyǵan orai jergilikti biýdjetten biyl kóshelerdi jaryqtandyrýǵa 3,5 mlrd teńge bólinip otyr. Sonyń arqasynda birqatar saiajailarda jáne «Hýtor», «Shyǵys» jáne basqa da aýdandarda kósheler jaryqtandyrylady.
Sonymen qatar qala turǵyndardyń ómir súrýine jaily bolýyna da nazar aýdarylady. Iaǵni halyq baspanamen, jylýmen, elektrmen, sýmen, gazben qamtamasyz etilýi kerek. Máselen, ótken jyly Taldyqorǵanda 1283 otbasyǵa baspana berilse, biyl turǵyn úige ie bolatyndardyń sany 1500-ge jýyqtaidy dep josparlanyp otyr.
Shahardyń kórki abattandyrýǵa tikelei bailanysty. Sondyqtan aýlalarǵa vorkaýt alańdaryn salý, kóp qabatty úilerdiń shatyrlary men qasbetterin jańartý, aryqtar men arnalardy qalpyna keltirý jalǵastyrylady. Byltyr 28 kópqabatty úidiń shatyryna jóndeý jumystary júrgizilgen. Kóppáterli 10 úidiń qasbeti jasaldy. Biyl taǵy 30 kópqabatty úidiń shatyry men 32 úidiń qasbeti jóndeledi.
"Qaladaǵy «Ulan» yqsham aýdanyna otyz jyldan astam ýaqyt jóndeý júrgizilmegen. Aýdandy abattandyrý máselesin uzaq talqylap, saraptama jasap baryp, durys sheshim qabyldadyq. Sol arqyly tájiribe qalyptasty. Endi keshendi túrde jumys isteimiz. Byltyr aldymen 25 kóp páterli úidiń 5 aýlasyn jóndedik, qalǵan aýlalardy biyl bitiremiz. Sondai-aq «Ulan» yqsham aýdanyndaǵy jóndeýdi qajet etetin kóp qabatty úilerdiń shatyryn jóndeimiz. Sodan soń «Jetisý» jáne «Juldyz» yqsham aýdandaryna aýysyp, keshendi tártippen kógaldandyrý jumystary júrgiziledi. Iaǵni, aldymen qalanyń nazardan tys qalǵan shetki aýdandaryn qamtimyz", - dedi B. Isabaev.
Kógaldandyrý jaiyna kelsek, Taldyqorǵanda ótken jyly 10 myńdai aǵash otyrǵyzylsa, biyl 12 myńnan astam kóshet egý kózdelgen. Qalanyń «Qulager» shaǵyn aýdanynda aýmaǵy 1,2 gektar bolatyn jańa saiabaq salý josparda bar. Al «Birlik» shaǵyn aýdanda jańa skver paida bolady. Sol siiaqty aǵashtar men kógaldardy sýarý júiesin retteý qolǵa alynǵan. Búginge deiin shamamen 10 shaqyrymdai aryq júiesine jóndeý júrgizildi, bul jumys biyl da jalǵasady. Oǵan qosa Ortalyq jáne «Jastar» saiabaqtaryna aǵymdaǵy jóndeý jasalady.
