Birinshi vitse-premer Roman Skliar Primeminister.kz saityna bergen suhbatynda Qazaqstandaǵy monoqalalardyń ónerkásiptik damý áleýeti týraly aitty, - dep habarlaidy Dalanews.kz.
Máselen, Ekibastuz qalasynda«Railways Systems KZ» kompaniialar toby temirjol mashinasyn jasaý salasyndaǵy eń zamanaýi jabdyqtardy óndirýdiń jetinshi jelisiniń qurylysyn belsendi júrgizýde. Buǵan deiin kásiporyn Ekibastuz qalasynda temirjol salasy úshin 6 ónim túrin shyǵarǵan.
Saran qalasynda burynǵy rezeńke-tehnikalyq buiymdar (RTB) zaýytynyń negizinde birqatar óndirister quryldy. Olardyń arasynda synaq rejiminde ónim shyǵara bastaǵan shina zaýyty da bar. Bul rette Qazaqstanda bul ónim 2000 jyldan beri shyqpaǵan. Birinshi vitse-premerdiń aitýynsha, maýsym aiynda alǵashqy óndiris bastalady jáne biyl qalada 1 mln eń zamanaýi shinalar shyǵarylady.
«Óńdeýshi ónerkásiptiń damýy elimizdiń ekonomikasyn ózgertip qana qoimai, monoqalalardyń ómirine de ózgerister engizip jatyr. Men Ekibastuzdy bekerge mysalǵa keltirgen joqpyn. Búginde onda iri mashina jasaý klasteri damyp keledi jáne temirjol mashinasyn jasaý ónimderiniń 72%-y óndiriledi. Maýsym aiynda GRES-1 alańynyń janyndaǵy eń iri ferroqorytpa zaýyty óz jumysyn bastaidy. Saran qalasynda burynǵy RTB zaýytynyń bazasynda jańa kásiporyndar salyndy: shina zaýyty, shaǵyn torapty qurastyrý ádisimen avtobýstar shyǵaratyn QazTehna, turmystyq tehnika shyǵaratyn zaýyt bar. Sondai-aq túzý dánekerlengen qubyrlar shyǵaratyn kásiporyn salynyp jatyr. Qazirdiń ózinde monoqalanyń ózi jańa ómirge qalai beiimdelip, túrlenip jatqanyn kórýge bolady. Buryn turǵyndary tastap ketken úiler endi bos emes, kúrdeli jóndeý jumystary júrgizilýde. Úkimet bul baǵyttaǵy jumysty jalǵastyratyn bolady. Jergilikti qamtý úlesin arttyrý jáne investitsiia tartý jastar úshin joǵary ónim óndiretin, jaqsy aqy tólenetin jumys oryndaryn ashýǵa múmkindik beredi. Bul – basty mindet. Eksporttyq áleýetti arttyrý, importty almastyrý, biýdjetke túsetin salyqtar, jumys oryndarynyń ashylýy júieli túrde júzege aspaq. Iaǵni, bul bárin ózimen birge ilestirip áketetin tutas bir lokomotiv», — dep atap ótti Roman Skliar.
