Astanada jol erejesin buzǵan kólikterdi aqyly evakýasıalaý bastaldy, dep habarlaıdy Dala News.

Bul shara kólik júktemesin azaıtý jáne jol qozǵalysy qaýipsizdigin arttyrý maqsatynda engizilgen. Endi ereje buzǵan júrgizýshilerdiń kólikteri arnaıy komýnaldyq turaqtarǵa jetkiziledi.

Qalalyq jol qozǵalysyn uıymdastyrý ortalyǵynyń málimetinshe, durys qoıylmaǵan kólikter kóshelerdiń ótkizý qabiletin 50 paıyzǵa deıin tómendetedi. Sonyń saldarynan keptelister paıda bolyp, qozǵalys qıyndaıdy.

«Ereje buzý jaǵdaılary, ásirese jaıaý júrginshiler ótkelderinde, trotýarlarda jáne múmkindigi shekteýli jandarǵa arnalǵan oryndarda jıi kezdesedi. Mundaı jaǵdaılar qaladaǵy qaýipsizdikke tikeleı áser etedi», – dedi ortalyq dırektory Marat Sadýov.

Astanada kólik sany 600 myńnan asqan, al kún saıyn 2 myńnan astam osyndaı zańbuzýshylyq tirkeledi.

Evakýasıa kóp adam jınalatyn oryndarda jáne tyıym salý belgileri ornatylǵan aýmaqtarda júrgiziledi. Proses tolyq sıfrlandyrylǵan: arnaıy júıeler buzýshylyqty tirkep, derekterdi polısıaǵa jiberedi. Keıin kólik ıesine eGov Mobile arqyly habarlama keledi.

Eger júrgizýshi kóligin ornynda rettep úlgerse, tek ákimshilik shara qoldanylady jáne evakýasıa jasalmaıdy.

Kólikti qaıtarý úshin polısıa departamentine júginip, ruqsat alyp, arnaıy turaqtan alý qajet. Evakýasıa quny 3 AEK, al turaqta saqtaý aqysy bólek tólenedi.