Almaty oblysynda «Nur Otan» partıasynyń 2021-2025 jyldardaǵy saılaýaldy baǵdarlamasy aıasynda úsh aýysymda oqytý máselesin sheshý úshin jáne beıimdelgen mektepterdiń ornyna 115 mektep salynýy tıis. Bıylǵy jyly josparlanǵan 17 mekteptiń 5400 oryndy 12-si iske qosyldy, taǵy beseýi jyl sońyna deıin paıdalanýǵa beriledi. Bul týraly búgin Prezıdent janyndaǵy Ortalyq komýnıkasıalar qyzmeti alańynda ótken brıfıń barysynda Almaty oblysynyń ákimi Amandyq Batalov aıtty, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap. 

Oblys ákimniń aıtýynsha, jyl basynan beri qoldanysqa berilgen 12 mekteptiń altaýy – jekemenshik mektep. Budan basqa, 137 mektepte jańǵyrtý jumystary júrgizilýde, oǵan 11,3 mlrd.teńge baǵyttalǵan. Jyl basynan beri 9590 oryndy 135 balabaqsha ashyldy.

– 3-6 jastaǵy balalardy qamtýda bıylǵa josparlanǵan kórsetkishimiz – 99,9 prosent. Oǵan qol jetkizý maqsatynda memlekettik tapsyrysqa qosymsha 2,5 mlrd.teńge qarastyryldy. Jalpy, oblys boıynsha memlekettik tapsyrys kólemi 42,5 mlrd teńgeni quraıdy, onyń 34,3 mlrd teńgesi – jergilikti búdjet qarajaty. Al 2022 jyly qamtý kórsetkishin 100%-ke jetkizemiz, – dedi Amandyq Batalov.