Biyl Jetisý oblysynda 41 myńnan astam oqýshynyń mektepke jinalýyna kómek kórsetiledi. Sonyń ishinde áleýmettik jaǵdaiy tómen otbasynan shyqqan 25 myńdai balaǵa jalpy bilim berý qorynan járdem jasalsa, 16 650 balaǵa «Mektepke jol» respýblikalyq aktsiiasy aiasynda qoldaý kórsetilmek,- dep habarlaidy Dalanews.kz
Oblystyq bilim basqarmasynyń málimetine qaraǵanda, Jetisý oblysynda áleýmettik jaǵdaiy tómen otbasyndaǵy 25 myńdai balaǵa mektep formasy men keńse taýarlaryn alýǵa
1,1 mlrd. teńge bólingen. Búgingi kúni atalǵan qarajat ata-analardyń jeke esep shottaryna tolyǵymen aýdaryldy.
Sol siiaqty oblysta respýblikalyq «Mektepke jol» aktsiiasy aiasynda tamyz aiynyń alǵashqy jartysynda 8400-den astam balaǵa kómek kórsetildi, atap aitqanda mektep formasy, aiaq kiim, keńse taýarlary berildi. Jalpy 16 650 bala kómekpen qamtylady dep josparlanǵan. Qaiyrymdylyq kómek sharasyna kásipkerler, etno-mádeni birlestikter, úkimettik emes uiymdar t.b. belsene atsalysýda. Aktsiia 30 qyrkúiekke deiin jalǵasady.
«Ata-analardyń naryqtaǵydan tómen baǵada mektep formalary men keńse taýarlaryn satyp alýy úshin arnaiy mektep jármeńkeleri uiymdastyrylýda. Atap aitqanda, Taldyqorǵan jáne Tekeli qalalarynda ortalyq arbatta, Kóksý aýdanynda Balpyq bi aýylynda Qaban jyraý kóshesi, 17-úide ornalasqan «Dastan» saýda úiiniń aldynda, Qaratal aýdany Úshtóbe qalasynda Jeltoqsan kóshesi, 1 mekenjaiyndaǵy «Báiterek» saýda úiiniń aldynda, Sarqan aýdany Sarqan qalasy Tynyshpaev kóshesindegi ortalyq alańda osyndai jármeńkeler ótip jatyr. Aldaǵy ýaqytta Aqsý aýdany Jansúgirov aýylyndaǵy, Eskeldi aýdany Qarabulaq aýylyndaǵy ortalyq bazarlarda, Alakól aýdany Úsharal qalasynda D. Qonaev kóshesi, 73 mekenjaiynda ornalasqan «Dostyq» saýda úiiniń aldynda, Kerbulaq aýdany Saryózek aýyly Momyshuly kóshesindegi ortalyq alańda, Panfilov aýdany Jarkent qalasyndaǵy mádeniet úiiniń aldynda mektep jármeńkelerin uiymdastyrý josparda bar», - delingen oblystyq bilim basqarmasynyń habarlamasynda.
Jalpy, Jetisý oblysy jańa oqý jylyn 130 myńnan astam oqýshymen bastasa, sonyń 13 myńǵa jýyǵy birinshi synyp oqýshylary bolmaq.
