Májilis depýtaty Abzal Quspan Qytaidan ákelingen BYD DESTROYER 05 gibridti kólikterine bailanysty týyndaǵan daýǵa qatysty memlekettik kirister organdarynyń áreketin qatań synǵa aldy, dep habarlaidy dalanews.kz.
Onyń aitýynsha, júzdegen qazaqstandyq otbasy men kásipkerler buryn zańdy túrde rásimdelgen kólikter úshin keiinnen milliondaǵan teńge kóleminde qosymsha tólemder men aiyppuldarǵa tap bolǵan.
Depýtattyń sózinshe, másele qarapaiym azamattar men importtaýshylardyń memleket bergen resmi qujattarǵa senip áreket etýinen bastalǵan. Kólikterdi elge ákelmes buryn olar Memlekettik kirister departamentine júginip, taýardy jikteý boiynsha resmi qorytyndy alǵan. Keden organdary qozǵaltqyshtardyń qýatyn anyqtap, aldyn ala sheshim shyǵarǵan. Sol qujatqa sáikes atalǵan kólikterge kedendik baj salyǵy nól paiyz bolǵan.
«Meniń depýtattyq saýalym júzdegen qazaqstandyq otbasy men adal kásipkerler memlekettik kirister organdarynyń zańsyz ári agressivti áreketteriniń saldarynan tap bolǵan kúrdeli jaǵdaiǵa bailanysty joldanyp otyr. Áńgime BYD DESTROYER 05 markaly kólikterge qatysty keiinnen jappai baj salyǵy men aiyppuldardyń eseptelýi týraly bolyp otyr», - dedi Quspan.
Onyń aitýynsha, azamattar memleket bekitken sheshimge súienip, deklaratsiialardy zań talaptaryna sai toltyrǵan, barlyq mindetti tólemderdi tólep, kólikterin resmi tirkeýden ótkizgen. Alaida biraz ýaqyttan keiin memlekettik kirister organdary ózderiniń burynǵy sheshimderin jaramsyz dep tanyp, kólik ielerine ótken kezeńder úshin qosymsha tólem talap ete bastaǵan.
Depýtat mundai sheshimniń jańa táýelsiz saraptamaǵa emes, naryqtaǵy resmi diler bolyp sanalatyn kommertsiialyq qurylymnyń hatyna negizdelgenin aitty. Onyń pikirinshe, bul jaǵdai naryqtaǵy adal básekelestik qaǵidattaryna kúmán týǵyzady.
«Olar ózderiniń burynǵy sheshimderin kúshin joidy da, azamattarǵa: “Biz qatelesippiz, endi úlken kólemde baj salyǵyn tóleńizder” dedi. Eń soraqysy, bul sheshim táýelsiz saraptamaǵa emes, naryqtaǵy básekeles bolyp sanalatyn kommertsiialyq uiymnyń hatyna negizdelgen», - dedi májilismen.
Abzal Quspan Konstitýtsiia men qoldanystaǵy zańnama azamattardyń jaǵdaiyn nasharlatatyn normalarǵa keri kúsh berýge tyiym salatynyn eske saldy. Soǵan qaramastan, onyń sózinshe, keibir memlekettik organdar zańdardy biýdjet múddesine qarai túsindirip, qarapaiym azamattardyń quqyqtaryn ekinshi orynǵa ysyryp keledi.
Depýtattyń málimetinshe, jaǵdaidy ýshyqtyrǵan taǵy bir másele – azamattardyń bank shottaryn aldyn ala eskertýsiz buǵattaý. Onyń aitýynsha, kóptegen adamdar tek kartochkalary jabylǵannan keiin ǵana ózderine qatysty tekserý júrgizilip jatqanyn bilgen.
«400-den astam otbasy, 5 myńnan astam azamat zardap shekti. Banktik shottar buǵattaldy, biznes jumysy toqtady, adamdar tyǵyryqqa tireldi. Bul qoǵamdaǵy narazylyqty kúsheitetin jaǵdai», - dedi Quspan.
Májilismen buǵan deiin Qarjy ministrine resmi saýal joldap, máseleni ministrlik deńgeiinde qaraýdy talap etkenin aitty. Alaida onyń sózinshe, naqty jaýaptyń ornyna kezdesý Memlekettik kirister komiteti tóraǵasynyń orynbasary deńgeiinde ótkizilmek bolǵan.
Depýtat bul másele buǵan deiin de qoǵamda qyzý talqylanǵanyn, ony depýtattar, qoǵam belsendileri jáne buqaralyq aqparat quraldary birneshe ret kótergenin atap ótti. Sondyqtan ol Úkimetten Memlekettik kirister komiteti men óńirlik departamentterdiń áreketine qyzmettik tekserý júrgizýdi, azamattarǵa joldanǵan daýly habarlamalardy keri qaitaryp, tolyq ári ashyq tekserý aiaqtalǵanǵa deiin buǵattalǵan shottardy ashýdy talap etti.
Sonymen qatar Abzal Quspan salyq organdarynyń áreketterinde jekelegen kompaniialarǵa artyqshylyq berý belgileri bar-joǵyn tekserýdi jáne zań buzýshylyqtarǵa jol bergen laýazymdy tulǵalardy jaýapkershilikke tartýdy surady.
Eske salaiyq, 18 mamyrda Memlekettik kirister komiteti Qytaidan ákelingen BYD markaly 623 gibridti kólik boiynsha kedendik rásimdeý kezinde zań buzýshylyqtar anyqtalǵanyn málimdep, 450 azamatqa tiisti habarlama joldaǵan bolatyn.
