Áleýmettik jelilerde Atyraý oblysynda joǵalǵan otbasyǵa qatysty túrli málimet tarap, qoǵam nazaryn aýdaryp otyr. Ásirese, jeli qoldanýshylary Hacker Atyrau paraqshasynda jariialanǵan aqparatty qyzý talqylap jatyr, dep habarlaidy Dalanews.kz.
Paraqsha avtory ashyq baza arqyly joǵalǵandardyń SIM-kartalaryn baqylaǵanyn, bank kartasymen jasalǵan tólemderdi anyqtaǵanyn aitty. Ol osy otbasy joǵalǵannan keiin biriniń SIM-kartasy mezgil-mezgil qoldanylyp otyrǵanyn da málimdedi. Sondai-aq, otbasy músheleriniń biriniń bank kartasynan qarasha jáne jeltoqsanda zeinetaqy tólemderi alynǵany týraly aqparat taraǵan bolatyn.
Aqparatty taratqan adamnyń ózi memlekettik júielerdi buzbaǵanyn, tek "ashyq derekterdi, SIM-kartalardy jáne bailanys operatorlarynan alynǵan málimetterdi" paidalanǵanyn aitty.
Búgin BAQ ókilderine bergen jaýabynda politsiia "atyraýlyq hakerge" qatysty da pikir bildirdi.
"Ol (Hacker Atyrau paraqshasynyń iesi - esk.) bizdiń memlekette emes, basqa shetelde júr. Ol halyqqa qol ushyn berip, kómekteskisi kelip, áreketter jasap jatyr. Bizde jedel jumystar bar, keibir áreketteri bizge qarama-qaishy keledi. Jumysymyzdy ári qarai júrgizý úshin ońdy-soldy málimet bermegen durys", - dedi Atyraý oblysy Politsiia departamenti bastyǵynyń birinshi orynbasary, politsiia polkovnigi Quttybai Sadyqov.
Eske salaiyq, buǵan deiin Atyraý oblysynda bir otbasy izdestirilip jatqany habarlandy. Politsiiaǵa aryz 25 jeltoqsanda túsken.
Buǵan deiin Atyraý oblysy PD ókilderi joǵalǵan adamdardyń uialy telefondarynan signaldar Qazaqstan aýmaǵynda birneshe ret tirkelip, qosylyp-sóndirilgeni anyqtalǵanyn málimdedi.
"Sońǵy tirkelgen derek Shymkent qalasynda bolǵan. Izdestirý jumystaryn úilestirý maqsatynda arnaiy jedel tergeý toby qurylyp, oǵan Ishki ister ministrliginiń mamandary da jumyldyryldy. Sonymen qatar, qazir osy otbasynyń kishi qyzy men kúieý balasy shet memlekette júrgeni anyqtaldy. Alaida týystary olardyń joǵalýyna bailanysty aryz túsirmegen. Soǵan qaramastan quqyq qorǵaý organdary tekserý jumystaryn bastady", - dedi politsiia.
