Ulttyq kásipkerler palatasy bul máselege qatysty túsinikteme alý úshin QR Densaýlyq saqtaý ministrligi men QR Bas prokýratýrasyna júgindi.
Búginde, ókinishke qarai, ekpe saldyrmaǵan azamattardyń jumysqa barǵanyn anyqtaýdyń biryńǵai algoritmi joq. Bul faktilerdi kim jáne qalai anyqtaityny belgisiz. Sonymen qatar, erekshe jaǵdailar bar - sońǵy 3 aida COVID-19 juqtyryp aýyrǵan adamdar, meditsinalyq ruqsaty bar azamattar jumys oryndaryna jiberiledi.
Mundai tulǵalar týraly málimet kórsetilgen aqparattyq baza joq. Bul másele de ashyq kúiinde qalyp otyr.
Munyń bári kásiporyndarda vaktsinatsiialanbaǵan faktilerdi anyqtaý úshin eskerilýi kerek, – dep túsindirdi "Atameken" QR UKP basqarma tóraǵasy orynbasarynyń m.a. Erbol Óstemirov.
Ulttyq palata bul máseleni Densaýlyq saqtaý ministrligimen pysyqtaýǵa daiyn. Bizdiń mindetimiz – adal kásipkerlerge qatysty zańbuzýshylyqqa, tekserýshi jáne monitoring toptar tarapynan zańbuzýshylyqqa jol bermeý.
Bas prokýratýradan resmi jaýap keldi.
"Ákimshilik quqyq buzýshylyq týraly kodekstiń atalǵan 425 jáne 462-baptarynda vaktsina saldyrmaǵan qyzmetkerler úshin jaýapkershilikke tartý qarastyrylmaǵan.
Ákimshilik quqyq buzýshylyq týraly kodekstiń 462-babynyń 3-bóligine sáikes, sýbekt ózine zańdy negizde berilgen sanitarlyq-epidemiologiialyq baqylaý qyzmetkerleriniń aktilerin oryndamaǵany úshin jaýapqa tartylýy múmkin.
Mundai aktiler tekserý júrgizgen jaǵdaida beriledi. Kásipkerlik kodekstiń 143-baby 3-tarmaǵyna sáikes, tek tekserý paraqtarynda belgilengen talaptar boiynsha sýbektige (obektige) baryp, tekserý jáne baqylaý, qadaǵalaýǵa bolady...
Halyqtyń sanitariialyq-epidemiologiialyq densaýlyǵy salasyndaǵy tekserý paraqtarynda ekpe egý talaby qarastyrylmaǵan", – delingen vedomstvonyń resmi hatynda.
"Sonymen, qyzmetkerlerdiń vaktsina saldyrǵanyn tekserý úshin quqyqtyq negiz joq", – dep málimdedi Erbol Óstemirov.
Sondai-aq, Ákimshilik quqyq buzýshylyq týraly kodekstiń 425-baby boiynsha ákimshilik jaza qoldanýǵa negiz joq, óitkeni Bas memlekettik sanitariialyq dárigerdiń qaýlysy Normativtik quqyqtyq akt bolyp eseptelmeidi jáne zańnamaǵa qoldanylmaidy.
"Muny Ulttyq kásipkerler palatasyna Bas prokýratýra qyzmetkerleri rastady", – dedi Erbol Ústemirov.
Monitoring toptarǵa keletin bolsaq, olar tek 5 kriterii boiynsha (1. jumys rejimi; 2. otbasylyq, eske alý is-sharalaryn (banketter, úilený toilary, mereitoilar, eske alý) jáne adamdar kóp jinalatyn ózge de is-sharalardy ótkizýdi shekteýge qoiylatyn talaptar; 3. áleýmettik qashyqtyq; 4. betperde rejimin; 5. kelýshiler sanynyń limitinen asyp ketýi) tekserýge quqyly.
"Qyzmetkerlerdi vaktsinalaý monitoring top músheleriniń tekserýine jatatyn máseleler tizimine kirmeidi. Monitoring toptar tarapynan vaktsinatsiia reidterin júrgizý zańnamaǵa sáikes kelmeidi", – dep atap ótti Erbol Óstemirov.
Sonymen qatar, kásipkerler palatasynyń ókili jumys oryndarynda vaktsinatsiialanbaǵan faktilerdi anyqtaý algoritminiń bolmaýy sybailas jemqorlyq táýekelderin týdyrýy múmkin ekenin atap ótti.
Eger siz zańsyz tekserý faktine tap bolsańyz, kásiporynda vaktsina saldyrmaǵan qyzmetkerler (antideneleri nemese meditsinalyq anyqtamasy bar) bar bolǵany úshin aiyppul salynsa, birden Óńirlik kásipkerler palatasyna nemese prokýratýra organdaryna habarlasyńyz. Sondai-aq, Ulttyq palatanyń 1432 kol-ortalyǵyna qońyraý shalyńyz.
Eske salaiyq, buǵan deiin Qazaqstanda qyzmet kórsetý salasynyń qyzmetkerleri, sondai-aq 20-dan astam adam eńbek etetin iri ujymdardyń qyzmetkerleri vaktsinanyń birinshi komponentin 15 shildege deiin, al ekinshi komponentin 15 tamyzǵa deiin alýǵa mindetteldi.
"Atameken" kásipkerler bul ýaqytqa deiin eńbek ujymdary ekpe saldyryp úlgermeitinin málimdegennen keiin vaktsinalaý merzimi: birinshi komponent úshin 10 tamyzǵa deiin jáne ekinshisi úshin 1 qyrkúiekke deiin uzartyldy.
Jaqynda QR Densaýlyq saqtaý ministrligi vaktsina saldyrmaǵan qyzmetkerlerdi kásiporyndarǵa jiberetin jumys berýshilerge aiyppul salynady dep málimdegen bolatyn.
