ۇلتتىق كاسىپكەرلەر پالاتاسى بۇل ماسەلەگە قاتىستى تۇسىنىكتەمە الۋ ءۇشىن ق ر دەنساۋلىق ساقتاۋ مينيسترلىگى مەن ق ر باس پروكۋراتۋراسىنا جۇگىندى.
بۇگىندە، وكىنىشكە قاراي، ەكپە سالدىرماعان ازاماتتاردىڭ جۇمىسقا بارعانىن انىقتاۋدىڭ ءبىرىڭعاي الگوريتمى جوق. بۇل فاكتىلەردى كىم جانە قالاي انىقتايتىنى بەلگىسىز. سونىمەن قاتار، ەرەكشە جاعدايلار بار - سوڭعى 3 ايدا COVID-19 جۇقتىرىپ اۋىرعان ادامدار، مەديسينالىق رۇقساتى بار ازاماتتار جۇمىس ورىندارىنا جىبەرىلەدى.
مۇنداي تۇلعالار تۋرالى مالىمەت كورسەتىلگەن اقپاراتتىق بازا جوق. بۇل ماسەلە دە اشىق كۇيىندە قالىپ وتىر.
مۇنىڭ ءبارى كاسىپورىنداردا ۆاكسيناسيالانباعان فاكتىلەردى انىقتاۋ ءۇشىن ەسكەرىلۋى كەرەك، – دەپ ءتۇسىندىردى "اتامەكەن" ق ر ۇكپ باسقارما ءتوراعاسى ورىنباسارىنىڭ م.ا. ەربول وستەمىروۆ.
ۇلتتىق پالاتا بۇل ماسەلەنى دەنساۋلىق ساقتاۋ مينيسترلىگىمەن پىسىقتاۋعا دايىن. ءبىزدىڭ مىندەتىمىز – ادال كاسىپكەرلەرگە قاتىستى زاڭبۇزۋشىلىققا، تەكسەرۋشى جانە مونيتورينگ توپتار تاراپىنان زاڭبۇزۋشىلىققا جول بەرمەۋ.
باس پروكۋراتۋرادان رەسمي جاۋاپ كەلدى.
"اكىمشىلىك قۇقىق بۇزۋشىلىق تۋرالى كودەكستىڭ اتالعان 425 جانە 462-باپتارىندا ۆاكسينا سالدىرماعان قىزمەتكەرلەر ءۇشىن جاۋاپكەرشىلىككە تارتۋ قاراستىرىلماعان.
اكىمشىلىك قۇقىق بۇزۋشىلىق تۋرالى كودەكستىڭ 462-بابىنىڭ 3-بولىگىنە سايكەس، سۋبەكت وزىنە زاڭدى نەگىزدە بەرىلگەن سانيتارلىق-ەپيدەميولوگيالىق باقىلاۋ قىزمەتكەرلەرىنىڭ اكتىلەرىن ورىنداماعانى ءۇشىن جاۋاپقا تارتىلۋى مۇمكىن.
مۇنداي اكتىلەر تەكسەرۋ جۇرگىزگەن جاعدايدا بەرىلەدى. كاسىپكەرلىك كودەكستىڭ 143-بابى 3-تارماعىنا سايكەس، تەك تەكسەرۋ پاراقتارىندا بەلگىلەنگەن تالاپتار بويىنشا سۋبەكتىگە (وبەكتىگە) بارىپ، تەكسەرۋ جانە باقىلاۋ، قاداعالاۋعا بولادى...
حالىقتىڭ سانيتاريالىق-ەپيدەميولوگيالىق دەنساۋلىعى سالاسىنداعى تەكسەرۋ پاراقتارىندا ەكپە ەگۋ تالابى قاراستىرىلماعان"، – دەلىنگەن ۆەدومستۆونىڭ رەسمي حاتىندا.
"سونىمەن، قىزمەتكەرلەردىڭ ۆاكسينا سالدىرعانىن تەكسەرۋ ءۇشىن قۇقىقتىق نەگىز جوق"، – دەپ مالىمدەدى ەربول وستەمىروۆ.
سونداي-اق، اكىمشىلىك قۇقىق بۇزۋشىلىق تۋرالى كودەكستىڭ 425-بابى بويىنشا اكىمشىلىك جازا قولدانۋعا نەگىز جوق، ويتكەنى باس مەملەكەتتىك سانيتاريالىق دارىگەردىڭ قاۋلىسى نورماتيۆتىك قۇقىقتىق اكت بولىپ ەسەپتەلمەيدى جانە زاڭناماعا قولدانىلمايدى.
"مۇنى ۇلتتىق كاسىپكەرلەر پالاتاسىنا باس پروكۋراتۋرا قىزمەتكەرلەرى راستادى"، – دەدى ەربول ۇستەمىروۆ.
مونيتورينگ توپتارعا كەلەتىن بولساق، ولار تەك 5 كريتەريي بويىنشا (1. جۇمىس رەجيمى؛ 2. وتباسىلىق، ەسكە الۋ ءىس-شارالارىن (بانكەتتەر، ۇيلەنۋ تويلارى، مەرەيتويلار، ەسكە الۋ) جانە ادامدار كوپ جينالاتىن وزگە دە ءىس-شارالاردى وتكىزۋدى شەكتەۋگە قويىلاتىن تالاپتار؛ 3. الەۋمەتتىك قاشىقتىق؛ 4. بەتپەردە رەجيمىن؛ 5. كەلۋشىلەر سانىنىڭ ليميتىنەن اسىپ كەتۋى) تەكسەرۋگە قۇقىلى.
"قىزمەتكەرلەردى ۆاكسينالاۋ مونيتورينگ توپ مۇشەلەرىنىڭ تەكسەرۋىنە جاتاتىن ماسەلەلەر تىزىمىنە كىرمەيدى. مونيتورينگ توپتار تاراپىنان ۆاكسيناسيا رەيدتەرىن جۇرگىزۋ زاڭناماعا سايكەس كەلمەيدى"، – دەپ اتاپ ءوتتى ەربول وستەمىروۆ.
سونىمەن قاتار، كاسىپكەرلەر پالاتاسىنىڭ وكىلى جۇمىس ورىندارىندا ۆاكسيناسيالانباعان فاكتىلەردى انىقتاۋ الگوريتمىنىڭ بولماۋى سىبايلاس جەمقورلىق تاۋەكەلدەرىن تۋدىرۋى مۇمكىن ەكەنىن اتاپ ءوتتى.
ەگەر ءسىز زاڭسىز تەكسەرۋ فاكتىنە تاپ بولساڭىز، كاسىپورىندا ۆاكسينا سالدىرماعان قىزمەتكەرلەر (انتيدەنەلەرى نەمەسە مەديسينالىق انىقتاماسى بار) بار بولعانى ءۇشىن ايىپپۇل سالىنسا، بىردەن وڭىرلىك كاسىپكەرلەر پالاتاسىنا نەمەسە پروكۋراتۋرا ورگاندارىنا حابارلاسىڭىز. سونداي-اق، ۇلتتىق پالاتانىڭ 1432 كول-ورتالىعىنا قوڭىراۋ شالىڭىز.
ەسكە سالايىق، بۇعان دەيىن قازاقستاندا قىزمەت كورسەتۋ سالاسىنىڭ قىزمەتكەرلەرى، سونداي-اق 20-دان استام ادام ەڭبەك ەتەتىن ءىرى ۇجىمداردىڭ قىزمەتكەرلەرى ۆاكسينانىڭ ءبىرىنشى كومپونەنتىن 15 شىلدەگە دەيىن، ال ەكىنشى كومپونەنتىن 15 تامىزعا دەيىن الۋعا مىندەتتەلدى.
"اتامەكەن" كاسىپكەرلەر بۇل ۋاقىتقا دەيىن ەڭبەك ۇجىمدارى ەكپە سالدىرىپ ۇلگەرمەيتىنىن مالىمدەگەننەن كەيىن ۆاكسينالاۋ مەرزىمى: ءبىرىنشى كومپونەنت ءۇشىن 10 تامىزعا دەيىن جانە ەكىنشىسى ءۇشىن 1 قىركۇيەككە دەيىن ۇزارتىلدى.
جاقىندا ق ر دەنساۋلىق ساقتاۋ مينيسترلىگى ۆاكسينا سالدىرماعان قىزمەتكەرلەردى كاسىپورىندارعا جىبەرەتىن جۇمىس بەرۋشىلەرگە ايىپپۇل سالىنادى دەپ مالىمدەگەن بولاتىن.
