Almaty oblysy, Qarasai aýdanyna qarasty Umtyl aýyldyq okrýginde 10 jastaǵy balany qabaǵan itter talap, aýyr jaraqattady. Atalǵan jaǵdaiǵa qatysty saiasattanýshy Ǵaziz Ábishev pikir bildirdi. Onyń aitýynsha, mundai jaǵdai qaitalanǵan saiyn memlekettik organdar men jergilikti ákimdikterdiń jaýapkershiligine qatysty másele kún tártibine shyǵýy tiis, dep habarlaidy Dalanaews.kz.
Onyń pikirinshe, eger shabýyl jasaǵan itter kúzet maqsatynda ustalǵan bolsa, onda olardyń iesi tolyq jaýapqa tartylýy tiis.
"Mundai itterdiń jaýapkershilik aimaǵy tek ózine senip tapsyrylǵan aýmaqpen jáne iesiniń qaýipsizdigimen ǵana shektelýi kerek. Olar — tiri qarý. Al qarý qalai qoldanylsa, soǵan iesi jaýapty. Eger it óz aýmaǵynan shyǵyp, basqa adamǵa, ásirese balaǵa shabýyl jasasa — bul iesiniń tikelei kinási", — dedi sarapshy.
Sondai-aq mundai jaǵdaida jii aitylatyn «esikti jappady», «itti bireý ashýlandyrdy» degen syltaýlardyń jaýapkershilikten jaltarý ekenin aitty.
"Eger adam halyq kóp shoǵyrlanǵan ortada tiri qarý ustaityn bolsa — onyń tolyq baqylaýyn qamtamasyz etý — bul iesiniń tikelei mindeti", — deidi Ábishev.
Saiasattanýshy bul qańǵybas itter bolǵan jaǵdaida jaýapkershilik memlekettik organdarǵa júktelýi tiis ekenin atap ótti.
"Árbir tiri jannyń ómirin qurmettei otyryp, biz eń aldymen adamǵa laiyq qoǵam qurýdamyz. Jabaiy itterdiń úiiri — adam ómirimen salystyrýǵa kelmeidi. Memleket — qoǵam qaýipsizdigine jaýapty organ. Ol adamdardy janýarlardyń shabýylynan da qorǵaýy tiis", — dedi ol.
Sarapshy óz oiyn kommýnaldyq mysalmen túiindedi:
"Qys mezgilinde shatyrdan muz túsip ketýi múmkin bolsa, ol qasaqana emes, tabiǵi qubylys. Biraq sonyń ózinde kommýnaldyq qyzmetter ony aldyn ala alyp tastaidy. Al eger bul oryndalmasa, jáne bireýge ziian kelse — jaýapty adam jazalanady. Itterdiń adamdarǵa shabýyldaýy da — dál osyndai jaǵdai", — dep túiindedi Ǵaziz Ábishev.
Buǵan deiin...
Eske salaiyq, Almaty oblysynyń Qarasai aýdanyna qarasty aýylda 10 jastaǵy balany eki qabaǵan it talap, aýyr jaraqattady. Oqiǵa 30 mamyrda bolǵan.
Oqiǵanyń basty kýágeri ári balany qutqaryp qalǵan aýyl turǵyny, zeinetker Serikbek Saqaibekovtyń aitýynsha, sol kúni kóligimen jolaýshy áieldi úiine jetkizý úshin bara jatqanda, bir top balanyń shýlap, jan-jaqqa qasha jónelgenin kórgen.
Qazir 10 jastaǵy bala Qarasai aýdandyq ortalyq aýrýhanasynda aýyr jaraqatpen em alyp jatyr.
Balanyń anasy Ekaterina Býrmistrovanyń aitýynsha, ulynyń jaǵdaiy óte qiyn.
Prokýratýra is qozǵady
Almaty oblysynyń prokýratýrasy Qarasai aýdanyna qarasty Jalpaqsai aýylynda balaǵa itter shabýyl jasaǵan oqiǵa boiynsha politsiia qylmystyq is qozǵaǵanyn málimdedi.
Prokýratýranyń aldyn ala málimetterine sáikes shabýyl jasaǵan itter adamdardy ártúrli táýeldilikterden emdeitin jekemenshik ońaltý ortalyǵynyń aýmaǵynda ustalǵan.
"Tergeý aiasynda ońaltý ortalyǵynyń úi janýarlaryn ustaý erejelerin saqtaýyna quqyqtyq baǵa beriledi. Kináli tulǵalar zań talaptaryna sáikes qatań jaýapkershilikke tartylady. Istiń tergeý barysy prokýratýranyń erekshe baqylaýynda", - dep jazylǵan habarlamada.
Oqiǵanyń basty kýágeri ne deidi?
Oqiǵanyń basty kýágeri ári balany qutqaryp qalǵan aýyl turǵyny, zeinetker Serikbek Saqaibekovtyń aitýynsha, sol kúni kóligimen jolaýshy áieldi úiine jetkizip bara jatqanda, bir top balanyń shýlap, jan-jaqqa qasha jónelgenin kórgen.
"Balalardyń úreilenip qashqanyn kórip, bir sumdyq jaǵdai bolǵanyn sezdim. Qolymda eshbir qural joq edi, kóligimniń esik qaltasynan tek balyqqa alyp júretin bákimdi aldym da, birden oqiǵa ornyna júgirdim. Barsam, eki úlken qabaǵan it balaǵa jabysyp, ony súirep, julmalap jatyr eken. Pitbýl tuqymdas it balanyń sanyn shainap jatty, al ekinshi ovcharka iyǵynan ustap, jerge súirep barady. Qanǵa boialǵan bala "Aǵa, qutqaryńyzshy!" dep janushyra aiǵailady. Ony kórgende oilanbastan itterge qarsy shabýyldap, ekeýin de uryp óltirdim", – deidi Serikbek aqsaqal Stan.kz-ke bergen suhbatynda.
Qazir 10 jasar bala Qarasai aýdandyq ortalyq aýrýhanasynda aýyr jaraqatpen em alyp jatyr. Balanyń anasy Ekaterina Býrmistrovanyń aitýynsha, ulynyń jaǵdaiy óte qiyn.
"Ulymnyń qulaǵynyń jartysy joq, beti men basy qatty zaqymdanǵan, san etin itter julyp alǵan. Jaraqattary aýyr. Qazir meditsinalyq qujattardy jinap, sotqa júginýge daiyndalyp jatyrmyz. Itterdiń ieleri bolsa balanyń ózi kináli, aýmaqqa jaqyndady dep jalǵan aityp otyr", – deidi ol.
Serikbek Saqaibekovtiń erligi turǵyndar arasynda qyzý talqylanyp, kópshiliktiń qoldaýyna ie boldy. Alaida ólgen itterdiń ieleri zeinetkerden ótemaqy talap etip otyr eken.
"Qazir itterdiń ieleri kelip, maǵan itteri qymbat bolǵanyn aityp, aqshasyn tóleýimdi surap otyr. Sonda balany qutqarmai, qansyrap jatqanyn únsiz qarap turýym kerek pe edi?" – dep kúiindi ol.
