الماتى وبلىسى، قاراساي اۋدانىنا قاراستى ۇمتىل اۋىلدىق وكرۋگىندە 10 جاستاعى بالانى قاباعان يتتەر تالاپ، اۋىر جاراقاتتادى. اتالعان جاعدايعا قاتىستى ساياساتتانۋشى عازيز ابىشيەۆ پىكىر ءبىلدىردى. ونىڭ ايتۋىنشا، مۇنداي جاعداي قايتالانعان سايىن مەملەكەتتىك ورگاندار مەن جەرگىلىكتى اكىمدىكتەردىڭ جاۋاپكەرشىلىگىنە قاتىستى ماسەلە كۇن تارتىبىنە شىعۋى ءتيىس، دەپ حابارلايدى Dalanaews.kz.

ونىڭ پىكىرىنشە، ەگەر شابۋىل جاساعان يتتەر كۇزەت ماقساتىندا ۇستالعان بولسا، وندا ولاردىڭ يەسى تولىق جاۋاپقا تارتىلۋى ءتيىس.

"مۇنداي يتتەردىڭ جاۋاپكەرشىلىك ايماعى تەك وزىنە سەنىپ تاپسىرىلعان اۋماقپەن جانە يەسىنىڭ قاۋىپسىزدىگىمەن عانا شەكتەلۋى كەرەك. ولار — ءتىرى قارۋ. ال قارۋ قالاي قولدانىلسا، سوعان يەسى جاۋاپتى. ەگەر يت ءوز اۋماعىنان شىعىپ، باسقا ادامعا، اسىرەسە بالاعا شابۋىل جاساسا — بۇل يەسىنىڭ تىكەلەي كىناسى"، — دەدى ساراپشى.

سونداي-اق مۇنداي جاعدايدا ءجيى ايتىلاتىن «ەسىكتى جاپپادى»، «ءيتتى بىرەۋ اشۋلاندىردى» دەگەن سىلتاۋلاردىڭ جاۋاپكەرشىلىكتەن جالتارۋ ەكەنىن ايتتى.

"ەگەر ادام حالىق كوپ شوعىرلانعان ورتادا ءتىرى قارۋ ۇستايتىن بولسا — ونىڭ تولىق باقىلاۋىن قامتاماسىز ەتۋ — بۇل يەسىنىڭ تىكەلەي مىندەتى"، — دەيدى ابىشيەۆ.

ساياساتتانۋشى بۇل قاڭعىباس يتتەر بولعان جاعدايدا جاۋاپكەرشىلىك مەملەكەتتىك ورگاندارعا جۇكتەلۋى ءتيىس ەكەنىن اتاپ ءوتتى.

"ءاربىر ءتىرى جاننىڭ ءومىرىن قۇرمەتتەي وتىرىپ، ءبىز ەڭ الدىمەن ادامعا لايىق قوعام قۇرۋدامىز. جابايى يتتەردىڭ ءۇيىرى — ادام ومىرىمەن سالىستىرۋعا كەلمەيدى. مەملەكەت — قوعام قاۋىپسىزدىگىنە جاۋاپتى ورگان. ول ادامداردى جانۋارلاردىڭ شابۋىلىنان دا قورعاۋى ءتيىس"، — دەدى ول.

ساراپشى ءوز ويىن كوممۋنالدىق مىسالمەن تۇيىندەدى:

"قىس مەزگىلىندە شاتىردان مۇز ءتۇسىپ كەتۋى مۇمكىن بولسا، ول قاساقانا ەمەس، تابيعي قۇبىلىس. ءبىراق سونىڭ وزىندە كوممۋنالدىق قىزمەتتەر ونى الدىن الا الىپ تاستايدى. ال ەگەر بۇل ورىندالماسا، جانە بىرەۋگە زيان كەلسە — جاۋاپتى ادام جازالانادى. يتتەردىڭ ادامدارعا شابۋىلداۋى دا — ءدال وسىنداي جاعداي"، — دەپ تۇيىندەدى عازيز ابىشيەۆ.

بۇعان دەيىن...

ەسكە سالايىق، الماتى وبلىسىنىڭ قاراساي اۋدانىنا قاراستى اۋىلدا 10 جاستاعى بالانى ەكى قاباعان يت تالاپ، اۋىر جاراقاتتادى. وقيعا 30 مامىردا بولعان.

وقيعانىڭ باستى كۋاگەرى ءارى بالانى قۇتقارىپ قالعان اۋىل تۇرعىنى، زەينەتكەر سەرىكبەك ساقايبەكوۆتىڭ ايتۋىنشا، سول كۇنى كولىگىمەن جولاۋشى ايەلدى ۇيىنە جەتكىزۋ ءۇشىن بارا جاتقاندا، ءبىر توپ بالانىڭ شۋلاپ، جان-جاققا قاشا جونەلگەنىن كورگەن.

ءقازىر 10 جاستاعى بالا قاراساي اۋداندىق ورتالىق اۋرۋحاناسىندا اۋىر جاراقاتپەن ەم الىپ جاتىر.

بالانىڭ اناسى ەكاتەرينا بۋرميستروۆانىڭ ايتۋىنشا، ۇلىنىڭ جاعدايى وتە قيىن.

پروكۋراتۋرا ءىس قوزعادى

الماتى وبلىسىنىڭ پروكۋراتۋراسى قاراساي اۋدانىنا قاراستى جالپاقساي اۋىلىندا بالاعا يتتەر شابۋىل جاساعان وقيعا بويىنشا پوليسيا قىلمىستىق ءىس قوزعاعانىن مالىمدەدى.

پروكۋراتۋرانىڭ الدىن الا مالىمەتتەرىنە سايكەس شابۋىل جاساعان يتتەر ادامداردى ءارتۇرلى تاۋەلدىلىكتەردەن ەمدەيتىن جەكەمەنشىك وڭالتۋ ورتالىعىنىڭ اۋماعىندا ۇستالعان.

"تەرگەۋ اياسىندا وڭالتۋ ورتالىعىنىڭ ءۇي جانۋارلارىن ۇستاۋ ەرەجەلەرىن ساقتاۋىنا قۇقىقتىق باعا بەرىلەدى. كىنالى تۇلعالار زاڭ تالاپتارىنا سايكەس قاتاڭ جاۋاپكەرشىلىككە تارتىلادى. ءىستىڭ تەرگەۋ بارىسى پروكۋراتۋرانىڭ ەرەكشە باقىلاۋىندا"، - دەپ جازىلعان حابارلامادا.

وقيعانىڭ باستى كۋاگەرى نە دەيدى؟

وقيعانىڭ باستى كۋاگەرى ءارى بالانى قۇتقارىپ قالعان اۋىل تۇرعىنى، زەينەتكەر سەرىكبەك ساقايبەكوۆتىڭ ايتۋىنشا، سول كۇنى كولىگىمەن جولاۋشى ايەلدى ۇيىنە جەتكىزىپ بارا جاتقاندا، ءبىر توپ بالانىڭ شۋلاپ، جان-جاققا قاشا جونەلگەنىن كورگەن. 

"بالالاردىڭ ۇرەيلەنىپ قاشقانىن كورىپ، ءبىر سۇمدىق جاعداي بولعانىن سەزدىم. قولىمدا ەشبىر قۇرال جوق ەدى، كولىگىمنىڭ ەسىك قالتاسىنان تەك بالىققا الىپ جۇرەتىن باكىمدى الدىم دا، بىردەن وقيعا ورنىنا جۇگىردىم. بارسام، ەكى ۇلكەن قاباعان يت بالاعا جابىسىپ، ونى سۇيرەپ، جۇلمالاپ جاتىر ەكەن. پيتبۋل تۇقىمداس يت بالانىڭ سانىن شايناپ جاتتى، ال ەكىنشى وۆچاركا يىعىنان ۇستاپ، جەرگە سۇيرەپ بارادى. قانعا بويالعان بالا "اعا، قۇتقارىڭىزشى!" دەپ جانۇشىرا ايعايلادى. ونى كورگەندە ويلانباستان يتتەرگە قارسى شابۋىلداپ، ەكەۋىن دە ۇرىپ ءولتىردىم"، – دەيدى سەرىكبەك اقساقال Stan.kz-كە بەرگەن سۇحباتىندا.

ءقازىر 10 جاسار بالا قاراساي اۋداندىق ورتالىق اۋرۋحاناسىندا اۋىر جاراقاتپەن ەم الىپ جاتىر. بالانىڭ اناسى ەكاتەرينا بۋرميستروۆانىڭ ايتۋىنشا، ۇلىنىڭ جاعدايى وتە قيىن.

"ۇلىمنىڭ قۇلاعىنىڭ جارتىسى جوق، بەتى مەن باسى قاتتى زاقىمدانعان، سان ەتىن يتتەر جۇلىپ العان. جاراقاتتارى اۋىر. ءقازىر مەديسينالىق قۇجاتتاردى جيناپ، سوتقا جۇگىنۋگە دايىندالىپ جاتىرمىز. يتتەردىڭ يەلەرى بولسا بالانىڭ ءوزى كىنالى، اۋماققا جاقىندادى دەپ جالعان ايتىپ وتىر"، – دەيدى ول.

سەرىكبەك ساقايبەكوۆتىڭ ەرلىگى تۇرعىندار اراسىندا قىزۋ تالقىلانىپ، كوپشىلىكتىڭ قولداۋىنا يە بولدى. الايدا ولگەن يتتەردىڭ يەلەرى زەينەتكەردەن وتەماقى تالاپ ەتىپ وتىر ەكەن.

"ءقازىر يتتەردىڭ يەلەرى كەلىپ، ماعان يتتەرى قىمبات بولعانىن ايتىپ، اقشاسىن تولەۋىمدى سۇراپ وتىر. سوندا بالانى قۇتقارماي، قانسىراپ جاتقانىن ءۇنسىز قاراپ تۇرۋىم كەرەك پە ەدى؟" – دەپ كۇيىندى ول.