Tanymal saiasatker Ámirjan Qosan Ýkraina men Resei arasyndaǵy qym-qýyt shieleniske qatysty Dalanews.kz-ke pikir bildirdi.
Ámirjan Qosannyń sózinshe, soǵys siiaqty san qyrly, san múddeli qubylys bir prezidenttiń ekinshi prezidentke telefonmen qońyraý shalýynan keiin toqtamaidy.
"Búginde bul soǵys tek Ýkraina men onyń jerin basyp alǵan Resei arasyndaǵy soǵys emes. Bul soǵystyń basqa da túpkilikti benefitsiarlary bar, olar – birikken Eýropa men AQSh. «Soǵysty bir kúnde toqtata alamyn» dep, álemdik deńgeidegi №1 bitimger ataǵyna ie bolǵysy kelgen Tramp keshe «qaljyńdadym» dep, raiynan qaityp jatsa da, óz elektoratynyń aldynda abyroiyn saqtap qalý úshin qalai da eki jaqty – Ýkraina men Reseidi ýaqytsha bolsa da soǵysty toqtatýǵa kóndiretin syqyldy", - dep saraptady saiasatker.
Sarapshynyń boljamynsha, bul beibit kelisim alysqa barmaityn sekildi, óitkeni Ýkraina men Resei prezidentteriniń iadrolyq elektoraty bar.
"Jer aýmaǵynyń bir bóligin Reseige berýge kelisse, Zelenskiidiń ólgeni, al basyp alǵan jerden bas tartsa, Pýtinniń ólgeni. Sol sebepti, meniń oiymsha, áskeri qimyldar ýaqytsha damyldaǵanymen, órkeniettik, tarihi turǵyda bul soǵys jalǵasa bermek.
Onyń ústine geosaiasi ahýal kúrt ózgerdi: AQSh-tyń quityrqy saiasatyn kórgen Eýroodaq tez arada es jiyp, kúsh biriktire alatyn sekildi. Eýropa birikse, AQSh myna qaqtyǵysta kerek bolmai-aq qalady jáne de Ýkraina geografiia jaǵynan Eýropa aýmaǵyndaǵy el, sol sebepti Eýroodaq bul soǵysty óz soǵysy dep qabyldaýy ǵajap emes. Al AQSh bolsa, muhittyń arǵy jaǵynda. Sol sebepti Eýropa Ýkrainany jalǵyz qaldyrmaidy. Jáne de Eýropanyń soǵysqa qatysty jospary Tramptyń josparynan múldem bólek bop shyǵýy múmkin", - dedi Ámirjan Qosan.
Sarapshy Tramp týraly da birer sóz aitty.
"Buryn da aittym, qaitalaiyn: myna betinen qaitpasa, Tramp kóp uzamai óz elinde impichmentke ushyraýy ábden yqtimal. Onyń ózi bul soǵysqa tikelei áser eteri haq", - dep túiindedi ol.
Aita keteiik, 2025 jyly 28 aqpandaǵy Ýkraina prezidenti Vladimir Zelenskii, Amerika prezidenti Donald Tramp jáne AQSh vitse-prezidenti Djei Di Vens arasyndaǵy Aq úidegi kezdesýde qyzý daý týdy.
Al búgin BAQ-ta AQSh prezidenti Donald Tramp seisenbide Resei prezidenti Vladimir Pýtinmen sóilesetinin aitqany týraly aqparat tarady.
