تانىمال ساياساتكەر ءامىرجان قوسان ۋكراينا مەن رەسەي اراسىنداعى قىم-قۋىت شيەلەنىسكە قاتىستى Dalanews.kz-كە پىكىر ءبىلدىردى.

ءامىرجان قوساننىڭ سوزىنشە، سوعىس سياقتى سان قىرلى، سان مۇددەلى قۇبىلىس ءبىر پرەزيدەنتتىڭ ەكىنشى پرەزيدەنتكە تەلەفونمەن قوڭىراۋ شالۋىنان كەيىن توقتامايدى.

"بۇگىندە بۇل سوعىس تەك ۋكراينا مەن ونىڭ جەرىن باسىپ العان رەسەي اراسىنداعى سوعىس ەمەس. بۇل سوعىستىڭ باسقا دا تۇپكىلىكتى بەنەفيسيارلارى بار، ولار – بىرىككەن ەۋروپا مەن اقش. «سوعىستى ءبىر كۇندە توقتاتا الامىن» دەپ، الەمدىك دەڭگەيدەگى №1 بىتىمگەر اتاعىنا يە بولعىسى كەلگەن ترامپ كەشە «قالجىڭدادىم» دەپ، رايىنان قايتىپ جاتسا دا، ءوز ەلەكتوراتىنىڭ الدىندا ابىرويىن ساقتاپ قالۋ ءۇشىن قالاي دا ەكى جاقتى – ۋكراينا مەن رەسەيدى ۋاقىتشا بولسا دا سوعىستى توقتاتۋعا كوندىرەتىن سىقىلدى"، - دەپ ساراپتادى ساياساتكەر.

ساراپشىنىڭ بولجامىنشا، بۇل بەيبىت كەلىسىم الىسقا بارمايتىن سەكىلدى، ويتكەنى ۋكراينا مەن رەسەي پرەزيدەنتتەرىنىڭ يادرولىق ەلەكتوراتى بار.

"جەر اۋماعىنىڭ ءبىر بولىگىن رەسەيگە بەرۋگە كەلىسسە، زەلەنسكييدىڭ ولگەنى، ال باسىپ العان جەردەن باس تارتسا، ءپۋتيننىڭ ولگەنى. سول سەبەپتى، مەنىڭ ويىمشا، اسكەري قيمىلدار ۋاقىتشا دامىلداعانىمەن، وركەنيەتتىك، تاريحي تۇرعىدا بۇل سوعىس جالعاسا بەرمەك.

ونىڭ ۇستىنە گەوساياسي احۋال كۇرت وزگەردى: اقش-تىڭ قۇيتىرقى ساياساتىن كورگەن ەۋرووداق تەز ارادا ەس جيىپ، كۇش بىرىكتىرە الاتىن سەكىلدى. ەۋروپا بىرىكسە، اقش مىنا قاقتىعىستا كەرەك بولماي-اق قالادى جانە دە ۋكراينا گەوگرافيا جاعىنان ەۋروپا اۋماعىنداعى ەل، سول سەبەپتى ەۋرووداق بۇل سوعىستى ءوز سوعىسى دەپ قابىلداۋى عاجاپ ەمەس. ال اقش بولسا، مۇحيتتىڭ ارعى جاعىندا. سول سەبەپتى ەۋروپا ۋكراينانى جالعىز قالدىرمايدى. جانە دە ەۋروپانىڭ سوعىسقا قاتىستى جوسپارى ترامپتىڭ جوسپارىنان مۇلدەم بولەك بوپ شىعۋى مۇمكىن"، - دەدى ءامىرجان قوسان.

ساراپشى ترامپ تۋرالى دا بىرەر ءسوز ايتتى.

"بۇرىن دا ايتتىم، قايتالايىن: مىنا بەتىنەن قايتپاسا، ترامپ كوپ ۇزاماي ءوز ەلىندە يمپيچمەنتكە ۇشىراۋى ابدەن ىقتيمال. ونىڭ ءوزى بۇل سوعىسقا تىكەلەي اسەر ەتەرى حاق"، - دەپ تۇيىندەدى ول.

ايتا كەتەيىك، 2025 جىلى 28 اقپانداعى ۋكراينا پرەزيدەنتى ۆلاديمير زەلەنسكيي، امەريكا پرەزيدەنتى دونالد ترامپ جانە اقش ۆيسە-پرەزيدەنتى دجەي دي ۆەنس اراسىنداعى اق ۇيدەگى كەزدەسۋدە قىزۋ داۋ تۋدى.

ال بۇگىن باق-تا اقش پرەزيدەنتى دونالد ترامپ سەيسەنبىدە رەسەي پرەزيدەنتى ۆلاديمير پۋتينمەن سويلەسەتىنىن ايتقانى تۋرالى اقپارات تارادى.