"Kartada aqsha ustamańdar, aifon da jaramsyz bolyp qalady". Reseilik belsendilerdiń ásirese, Tik-tokta osyndai eskertý videolary kezdesip qalyp jatady. Sol aitqandar ekonomikalyq soǵys jaǵdaiyndaǵy Reseidiń basyna kele bastady. Kúni keshe AQSh sanktsiiasyna ushyraǵan iri bankterdiń biri - Gazpromnyń kartasyn ustaýshylarǵa osyndai jaǵymsyz habarlama jetip te úlgerdi, dep jazady Dalanews.kz.
"21 qarashadan bastap shetelde Union Pay júiesindegi kartamen tólem jasaýda qiyndyqtar týyndaýy múmkin. Eger siz shetelde bolsańyz, onda qolma-qol aqshany paidalanýǵa keńes beremiz", dep Gazprombank habarlamasyn RBK saity keltiredi.
Al Reseidiń óz ishinde bank qyzmetine qatysty eshqandai problema joq.
Beisenbide AQSh jariialaǵan sanktsiiaǵa Gazprombankpen qatar onyń jaqyn elderdegi ókildikteri men sheteldik alty enshiles kompaniiasy da ilindi. Ókildikteri qatarynda Qytai, Mońǵoliia, Úndistanmen birge Qazaqstandaǵysy da bar. Qazaqstandaǵy filial basshysy, resmi derekke súiensek, Asqar Aspandiiarov bolyp tabylady. Al enshiles kompaniialary Liýksembýrgte, Gonkongta, Shveitsariiada, Ońtústik Afrikada jáne ekeýi Kiprda ornalasqan.
Odan bólek halyqaralyq bailanysy bar 50 reseilik bank, baǵaly qaǵazdardy tirkeýshi reseilik 40 uiym, qarjy salasyndaǵy 15 sheneýnik te sanktsiiaǵa ilindi. Olardyń barlyǵy AQSh-tyń Sheteldik aktivterdi baqylaý basqarmasynyń (OFAC) veb-saityndaǵy tizimge engizildi. Osy jaǵynan alǵanda, AQSh ekonomikalyq soǵysta sheshýshi qadamdarǵa kirisip jatqan sekildi.
"Gazprombank - Reseidiń Ýkrainadaǵy áskeri is-qimyldardy qarjylandyrýshy quraly, onda da áskeri qyzmetkerlerge jáne maidan shebinde opat bolǵandardyń otbasylaryna ótemaqy tóleýi arqyly" dep Associated Press sanktsiia engizýdegi basty sebepti atap kórsetedi.
Gazprombanktiń búgingi kúnge deiin sanktsiiaǵa ilinbei kelgen sebebi, ol sheteldiktermen arada tólem jasaý úshin kerek bolyp kelgen. Ásirese, Eýropaǵa tabiǵi gaz tasymalynda mańyzdy ról atqarady. Biraq sońǵy jyldary Batys Resei gazyna táýeldilikten arylý úshin birqatar sharalar qabyldap, import kólemin 18%-ǵa deiin qysqartýǵa qol jetkizdi.
Aldymen Reseidiń ózi 2022 jyly Eýropaǵa gaz tasymalyn kúrt qysqartyp, energetikalyq daǵdarys týdyrýǵa tyrysty. Onyń ornyna Batys keme arqyly AQSh pen Katardan suiytylǵan tabiǵi gaz tasi bastady. Jalpy, Eýropa 2027 jyly Resei gazynan tolyqtai bas tartpaq. Munda qazir úlken kólemdi tutynýshy Slovakiia eli bolyp tur. Munyń qazaq gazy tasymalyna tompaq tusy bolýy múmkin be, ol jaǵyn Dalanews.kz alda jazatyn bolady...
