"كارتادا اقشا ۇستاماڭدار، ايفون دا جارامسىز بولىپ قالادى". رەسەيلىك بەلسەندىلەردىڭ اسىرەسە، تيك-توكتا وسىنداي ەسكەرتۋ ۆيدەولارى كەزدەسىپ قالىپ جاتادى. سول ايتقاندار ەكونوميكالىق سوعىس جاعدايىنداعى رەسەيدىڭ باسىنا كەلە باستادى. كۇنى كەشە اقش سانكسياسىنا ۇشىراعان ءىرى بانكتەردىڭ ءبىرى - گازپرومنىڭ كارتاسىن ۇستاۋشىلارعا وسىنداي جاعىمسىز حابارلاما جەتىپ تە ۇلگەردى، دەپ جازادى Dalanews.kz.
"21 قاراشادان باستاپ شەتەلدە Union Pay جۇيەسىندەگى كارتامەن تولەم جاساۋدا قيىندىقتار تۋىنداۋى مۇمكىن. ەگەر ءسىز شەتەلدە بولساڭىز، وندا قولما-قول اقشانى پايدالانۋعا كەڭەس بەرەمىز"، دەپ گازپرومبانك حابارلاماسىن ربك سايتى كەلتىرەدى.
ال رەسەيدىڭ ءوز ىشىندە بانك قىزمەتىنە قاتىستى ەشقانداي پروبلەما جوق.
بەيسەنبىدە اقش جاريالاعان سانكسياعا گازپرومبانكپەن قاتار ونىڭ جاقىن ەلدەردەگى وكىلدىكتەرى مەن شەتەلدىك التى ەنشىلەس كومپانياسى دا ءىلىندى. وكىلدىكتەرى قاتارىندا جۇڭگو، موڭعوليا، ۇندىستانمەن بىرگە قازاقستانداعىسى دا بار. قازاقستانداعى فيليال باسشىسى، رەسمي دەرەككە سۇيەنسەك، اسقار اسپاندياروۆ بولىپ تابىلادى. ال ەنشىلەس كومپانيالارى ليۋكسەمبۋرگتە، گونكونگتا، شۆەيساريادا، وڭتۇستىك افريكادا جانە ەكەۋى كيپردا ورنالاسقان.
ودان بولەك حالىقارالىق بايلانىسى بار 50 رەسەيلىك بانك، باعالى قاعازداردى تىركەۋشى رەسەيلىك 40 ۇيىم، قارجى سالاسىنداعى 15 شەنەۋنىك تە سانكسياعا ءىلىندى. ولاردىڭ بارلىعى اقش-تىڭ شەتەلدىك اكتيۆتەردى باقىلاۋ باسقارماسىنىڭ (OFAC) ۆەب-سايتىنداعى تىزىمگە ەنگىزىلدى. وسى جاعىنان العاندا، اقش ەكونوميكالىق سوعىستا شەشۋشى قادامدارعا كىرىسىپ جاتقان سەكىلدى.
"گازپرومبانك - رەسەيدىڭ ۋكرايناداعى اسكەري ءىس-قيمىلداردى قارجىلاندىرۋشى قۇرالى، وندا دا اسكەري قىزمەتكەرلەرگە جانە مايدان شەبىندە وپات بولعانداردىڭ وتباسىلارىنا وتەماقى تولەۋى ارقىلى" دەپ Associated Press سانكسيا ەنگىزۋدەگى باستى سەبەپتى اتاپ كورسەتەدى.
گازپرومبانكتىڭ بۇگىنگى كۇنگە دەيىن سانكسياعا ىلىنبەي كەلگەن سەبەبى، ول شەتەلدىكتەرمەن ارادا تولەم جاساۋ ءۇشىن كەرەك بولىپ كەلگەن. اسىرەسە، ەۋروپاعا تابيعي گاز تاسىمالىندا ماڭىزدى ءرول اتقارادى. ءبىراق سوڭعى جىلدارى باتىس رەسەي گازىنا تاۋەلدىلىكتەن ارىلۋ ءۇشىن ءبىرقاتار شارالار قابىلداپ، يمپورت كولەمىن 18%-عا دەيىن قىسقارتۋعا قول جەتكىزدى.
الدىمەن رەسەيدىڭ ءوزى 2022 جىلى ەۋروپاعا گاز تاسىمالىن كۇرت قىسقارتىپ، ەنەرگەتيكالىق داعدارىس تۋدىرۋعا تىرىستى. ونىڭ ورنىنا باتىس كەمە ارقىلى اقش پەن كاتاردان سۇيىتىلعان تابيعي گاز تاسي باستادى. جالپى، ەۋروپا 2027 جىلى رەسەي گازىنان تولىقتاي باس تارتپاق. مۇندا ءقازىر ۇلكەن كولەمدى تۇتىنۋشى سلوۆاكيا ەلى بولىپ تۇر. مۇنىڭ قازاق گازى تاسىمالىنا تومپاق تۇسى بولۋى مۇمكىن بە، ول جاعىن Dalanews.kz الدا جازاتىن بولادى...
