"Bizde de keshe komitet otyrysy boldy. Aqparatqa qol jetkizý týraly zańǵa túzetý engizýge qatysty jobaǵa birneshe áriptesterimmen birge, men de pikirimdi bildirdim. Jalpy, depýtattardyń zańǵa túzetý engizip qana qoimai, alyp tastaýǵa da quqyǵy bar. Bul oraida, biz óz múmkindigimizdi tolyq paidalanamyz", - dedi halyq qalaýlysy.
Ol Májilistiń de memlekettik organ ekenin eskertip, mártebesi men quzyreti bar ekenin alǵa tartty.
"Bizde qoǵamdyq palata jumys isteidi. Ol halyqtyń únine, narazalyǵyna, sózine árkez nazar aýdarady, rezonans týdyrǵan zań jobalaryna kez kelgen oqylymda aralasa alady", - dep túsindirdi Aidos Sarym.
Al Parlament Májilisiniń depýtaty Murat Ábenovtiń paiymynsha, bir jyldan az ýaqyt Parlament óziniń keńeitilgen ókilettikterin belsendi paidalana bastaǵanyn kórsetti. Máselen, Úkimet bastamalaryn qaita qaraýǵa qaitaryp, onyń ornyna óz zań jobalaryna bastamashylyq jasaýda.
"Endi burynǵydai emes, depýtattardyń ózderi zańnyń avtory bola bastady, onyń ishinde eń ózekti áleýmettik máseleler – qaryz aýyrtpalyǵy, aktivterdi qaitarý, sybailas jemqorlyqqa jaýapkershilikti arttyrý, oligarhtardyń yqpalyn azaitý, oiynǵa táýeldilik pen memlekettik kompaniialardyń monopoliiasyna qarsylyq syndy bastamalar bar.
Negizinde álemniń kóptegen elderinde 80-90 paiyz zańǵa bastamashy – Parlament, al Úkimet ony júzege asyrady. Qalypty órkenietti qoǵamda bul osylai bolýy kerek", - deidi halyq qalaýlysy.
Ol sońǵy kezderi oligarhiianyń bir bóligi óz múddelerin Úkimet arqyly sheshýde yqpalyn joǵaltyp, Májilis qyzmetine qatty ashýly ekenin alǵa tartty. Kásipkerliktiń múddesin qorǵaimyz degen jeleýmen maqalalar jariialanyp, Parlament bastamalaryn baqylaýǵa alý kerek, oiyn erejesin bilmeitin, tájiribesi az, jas depýtattar kóp degen pikir maqsatty túrde qalyptastyrýda.
Tutastai alǵanda, demokratiiany «joiyp», zań shyǵarý bastamasyn premer-ministrdiń qaraýyna qaitarǵylary keledi.
"Ekonomikalyq reforma jáne óńirlik damý komitetiniń búgingi otyrysynda Májilis depýtattarynyń narazylyǵyna «Qazaqstan Respýblikasynyń keibir zańnamalyq aktilerine ózgerister men tolyqtyrýlar engizý týraly» Zańnyń jobasynyń normalary sebep boldy. Óitkeni, ol qujat depýtattardyń ókilettikterin shekteýge baǵyttalǵan.
Bir qyzyǵy, bul túzetýlerdiń artynda qai sheneýnik turǵanyn bile almadyq. Prezident Toqaev usynǵan jáne jalpyhalyqtyq referendýmda qoldaý tapqan saiasi reformalarǵa kim kúmán keltirýde?", - dep saýal tastaidy Murat Ábenov.
Kórip otyrǵanymyzdai, oligopoliiaǵa burynǵydai lobbistik zań jobalaryn qaitadan Úkimet arqyly itermeleýge múmkindik berip, saiasi reformalardy «artqa ainaldyrýǵa», Parlamenttiń rólin tómendetýge degen umtylystaryn eshkim moiyndaǵysy kelmeidi.
"Quqyqtyq aktiler týraly zańǵa usynylyp otyrǵan túzetý «Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasynyń Konstitýtsiialyq zańyna qaishy keledi.
Zań jobasy usynystarynyń tujyrymdamalyq mazmunyna keletin bolsaq, Memleket basshysy 2019 jylǵy 1 qyrkúiektegi Joldaýynda «Kúshti Prezident – yqpaldy Parlament – jaýapty Úkimet» Qazaqstannyń saiasi júiesiniń formýlasyn atap kórsetti. Usynylyp otyrǵan normalar Úkimetke emes, Parlamentke esep bergizedi, tsenzýrany engizedi jáne zań shyǵarý bastamasynyń táýelsiz quqyǵynan aiyrady", - dep tujyrym jasaǵan depýtat.
