Tarbaǵatai aýdanynyń "Eleke sazynda" júrgizilip jatqan arheologiialyq qazba jumystary jergilikti turǵyndardyń ómirine, tabiǵatqa eshqandai zardabyn tigizip otyrǵan joq. Bul jóninde máseleniń mán-jaiyn tereńirek biletin jaýapty mamandar resmi aqparattarǵa súiene otyryp málim etti.
Esterińizde bolsa, jaqynda bir top Kókjyra aýylynyń turǵyny áleýmettik jelide Memleket basshysy Qasym-Jomart Toqaevqa «Árýaqtardy kúńirentpeiik» degen taqyrypta ashyq hat jazǵan. Ashyq hatta belsendiler osy aýdannyń «Eleke sazy» dep atalatyn jerinde 2017 jyldan beri júrgizilip jatqan arheologiialyq jumystardyń saldarynan, iaǵni qabirdegi árýaqtardy mazalaǵandyqtan jergilikti jerde ólim-jitim kóbeiip, keleńsiz jaǵdailar jiilep ketkenin alǵa tartqan.
Alaida jaýapty oryndar tarapynan júrgizilgen taldaýlar men naqty sandar qoǵam belsendileriniń bul deregi eshqandai shyndyqqa janaspaitynyn dáleldep otyr.
– Taldaý nátijelerine júginetin bolsaq, atalǵan hatta aitylǵan aqparat shyndyqtyń aýylynan alys ekenine kóz jetkizemiz. Aitalyq, 2018-2020 jyldar aralyǵynda Kókjyra aýyldyq okrýgine qarasty eldi mekenderde óz-ózine qol jumsaǵan birde-bir jaǵdai tirkelmegen. Bul aýdandyq politsiia bóliminiń bergen naqty aqparaty. Sondai-aq qazba jumystarynyń kesirinen adam ólimine ákelip soqqan jol-kólik apaty jiilep ketti degen derek te rastalǵan joq, – deidi aýdan ákimi Serikqazy Sadýaqasov.
Osy jaǵdaiǵa bailanysty ǵalymdar, tarihshylar, arheoologtar, din ókilderi jáne basqa da mamandar ózderiniń pikirin bildirip, jelide taralǵan jelsózge toqtaý aityp jatyr.
Tamyzdyń 10-y kúni quramynda Tarbaǵatai aýdanynyń ákimi Serikqazy Sadýaqasov, tarih ǵylymdarynyń doktory Ábdesh Tóleýbaev, Semei óńiri boiynsha ókil imam Asqar Muqanov jáne aýdandyq ortalyq aýrýhananyń bas dárigeriniń mindetin atqarýshy Sáýle Jakýpjanova bar top Kókjyra aýylynyń turǵyndarymen kezdesip, Eleke sazy jailaýyndaǵy qazba jumystaryna qatysty túsindirý jumystaryn júrgizdi.
Aýdan ákimi S.Sadýaqasov turǵyndarǵa qazba jumystary Elbasynyń «Rýhani jańǵyrý» baǵdarlamasy jáne «Uly dalanyń jeti qyry» baǵdarlamalyq maqalasy aiasynda júrgizilip jatqanyn túsindirse, tarih ǵylymdarynyń doktory Á.Tóleýbaev qazba jumystary barysynda tabylǵan jádigerlerdiń tarihi, rýhani jáne ǵylymi mańyzdylyǵyna keńinen toqtalyp ótti.
Sonymen qatar, aýdandyq ortalyq aýrýhananyń bas dárigeriniń mindetin atqarýshy S.Jakýpjanova turǵyndarǵa Kókjyra aýyly boiynsha keiingi úsh-tórt jylda tirkelgen óz-ózine qol jumsaý jáne psiho-nevrologiialyq aýytqýlary bar adamdar boiynsha naqty aqparat usynyp, áleýmettik jelide taralǵan aqparattyń shyndyqqa janaspaitynyn aityp, halyqty tynyshtyqqa shaqyrdy.
– Ómir bolǵan soń adamdar aýyrady, qaitys bolyp jatady. Biraq onyń bárin tylsym dúniemen bailanystyrý aqylǵa qonbaityn nárse. Máselen, naqty derekterge súiensek, keiingi eki jylda Kókjyra aýylynda birde-bir sýitsid tirkelmegen. Aýdan boiynsha, onyń ishinde Kókjyra aýyldyq okrýginde ólim-jitim deńgeii de ósken joq, burynǵy qalpynda. Kóbeiip ketti degen jalǵan sóz, – dep túsindirdi aýdandyq ortalyq aýrýhana bas dárigeriniń mindetin atqarýshy Saltanat Jakýpjanova.
Jiyn sońynda mamandar turǵyndardyń kókeiindegi saýaldarǵa naqty jaýap berdi. Al Kókjyra aýylynyń turǵyndary bolsa Prezidentke joldanǵan hatqa eshqaisysy qol qoimaǵanyn, tipti ol týraly endi ǵana estip turǵandaryn aityp tańyrqady.
