تارباعاتاي اۋدانىنىڭ "ەلەكە سازىندا" جۇرگىزىلىپ جاتقان ارحەولوگيالىق قازبا جۇمىستارى جەرگىلىكتى تۇرعىنداردىڭ ومىرىنە، تابيعاتقا ەشقانداي زاردابىن تيگىزىپ وتىرعان جوق. بۇل جونىندە ماسەلەنىڭ ءمان-جايىن تەرەڭىرەك بىلەتىن جاۋاپتى ماماندار رەسمي اقپاراتتارعا سۇيەنە وتىرىپ ءمالىم ەتتى.
ەستەرىڭىزدە بولسا، جاقىندا ءبىر توپ كوكجىرا اۋىلىنىڭ تۇرعىنى الەۋمەتتىك جەلىدە مەملەكەت باسشىسى قاسىم-جومارت توقايەۆقا «ءارۋاقتاردى كۇڭىرەنتپەيىك» دەگەن تاقىرىپتا اشىق حات جازعان. اشىق حاتتا بەلسەندىلەر وسى اۋداننىڭ «ەلەكە سازى» دەپ اتالاتىن جەرىندە 2017 جىلدان بەرى جۇرگىزىلىپ جاتقان ارحەولوگيالىق جۇمىستاردىڭ سالدارىنان، ياعني قابىردەگى ءارۋاقتاردى مازالاعاندىقتان جەرگىلىكتى جەردە ءولىم-جىتىم كوبەيىپ، كەلەڭسىز جاعدايلار جيىلەپ كەتكەنىن العا تارتقان.
الايدا جاۋاپتى ورىندار تاراپىنان جۇرگىزىلگەن تالداۋلار مەن ناقتى ساندار قوعام بەلسەندىلەرىنىڭ بۇل دەرەگى ەشقانداي شىندىققا جاناسپايتىنىن دالەلدەپ وتىر.
– تالداۋ ناتيجەلەرىنە جۇگىنەتىن بولساق، اتالعان حاتتا ايتىلعان اقپارات شىندىقتىڭ اۋىلىنان الىس ەكەنىنە كوز جەتكىزەمىز. ايتالىق، 2018-2020 جىلدار ارالىعىندا كوكجىرا اۋىلدىق وكرۋگىنە قاراستى ەلدى مەكەندەردە وز-وزىنە قول جۇمساعان بىردە-بىر جاعداي تىركەلمەگەن. بۇل اۋداندىق پوليسيا ءبولىمىنىڭ بەرگەن ناقتى اقپاراتى. سونداي-اق قازبا جۇمىستارىنىڭ كەسىرىنەن ادام ولىمىنە اكەلىپ سوققان جول-كولىك اپاتى جيىلەپ كەتتى دەگەن دەرەك تە راستالعان جوق، – دەيدى اۋدان اكىمى سەرىكقازى سادۋاقاسوۆ.
وسى جاعدايعا بايلانىستى عالىمدار، تاريحشىلار، ارحەوولوگتار، ءدىن وكىلدەرى جانە باسقا دا ماماندار وزدەرىنىڭ پىكىرىن ءبىلدىرىپ، جەلىدە تارالعان جەلسوزگە توقتاۋ ايتىپ جاتىر.
تامىزدىڭ 10-ى كۇنى قۇرامىندا تارباعاتاي اۋدانىنىڭ اكىمى سەرىكقازى سادۋاقاسوۆ، تاريح عىلىمدارىنىڭ دوكتورى ابدەش تولەۋبايەۆ، سەمەي ءوڭىرى بويىنشا وكىل يمام اسقار مۇقانوۆ جانە اۋداندىق ورتالىق اۋرۋحانانىڭ باس دارىگەرىنىڭ مىندەتىن اتقارۋشى ساۋلە جاكۋپجانوۆا بار توپ كوكجىرا اۋىلىنىڭ تۇرعىندارىمەن كەزدەسىپ، ەلەكە سازى جايلاۋىنداعى قازبا جۇمىستارىنا قاتىستى ءتۇسىندىرۋ جۇمىستارىن جۇرگىزدى.
اۋدان اكىمى س.سادۋاقاسوۆ تۇرعىندارعا قازبا جۇمىستارى ەلباسىنىڭ «رۋحاني جاڭعىرۋ» باعدارلاماسى جانە «ۇلى دالانىڭ جەتى قىرى» باعدارلامالىق ماقالاسى اياسىندا جۇرگىزىلىپ جاتقانىن تۇسىندىرسە، تاريح عىلىمدارىنىڭ دوكتورى ءا.تولەۋبايەۆ قازبا جۇمىستارى بارىسىندا تابىلعان جادىگەرلەردىڭ تاريحي، رۋحاني جانە عىلىمي ماڭىزدىلىعىنا كەڭىنەن توقتالىپ ءوتتى.
سونىمەن قاتار، اۋداندىق ورتالىق اۋرۋحانانىڭ باس دارىگەرىنىڭ مىندەتىن اتقارۋشى س.جاكۋپجانوۆا تۇرعىندارعا كوكجىرا اۋىلى بويىنشا كەيىنگى ءۇش-تورت جىلدا تىركەلگەن وز-وزىنە قول جۇمساۋ جانە پسيحو-نيەۆرولوگيالىق اۋىتقۋلارى بار ادامدار بويىنشا ناقتى اقپارات ۇسىنىپ، الەۋمەتتىك جەلىدە تارالعان اقپاراتتىڭ شىندىققا جاناسپايتىنىن ايتىپ، حالىقتى تىنىشتىققا شاقىردى.
– ءومىر بولعان سوڭ ادامدار اۋىرادى، قايتىس بولىپ جاتادى. ءبىراق ونىڭ ءبارىن تىلسىم دۇنيەمەن بايلانىستىرۋ اقىلعا قونبايتىن نارسە. ماسەلەن، ناقتى دەرەكتەرگە سۇيەنسەك، كەيىنگى ەكى جىلدا كوكجىرا اۋىلىندا بىردە-بىر سۋيسيد تىركەلمەگەن. اۋدان بويىنشا، ونىڭ ىشىندە كوكجىرا اۋىلدىق وكرۋگىندە ءولىم-جىتىم دەڭگەيى دە وسكەن جوق، بۇرىنعى قالپىندا. كوبەيىپ كەتتى دەگەن جالعان ءسوز، – دەپ ءتۇسىندىردى اۋداندىق ورتالىق اۋرۋحانا باس دارىگەرىنىڭ مىندەتىن اتقارۋشى سالتانات جاكۋپجانوۆا.
جيىن سوڭىندا ماماندار تۇرعىنداردىڭ كوكەيىندەگى ساۋالدارعا ناقتى جاۋاپ بەردى. ال كوكجىرا اۋىلىنىڭ تۇرعىندارى بولسا پرەزيدەنتكە جولدانعان حاتقا ەشقايسىسى قول قويماعانىن، ءتىپتى ول تۋرالى ەندى عانا ەستىپ تۇرعاندارىن ايتىپ تاڭىرقادى.
