Týrizm jáne sport ministrliginiń Oiyn biznesin jáne lotereiany retteý komiteti lotereiadan jeńilgen qazaqstandyqtardyń aqshasyn qaitarý týraly jalǵan aqparat taraǵanyn habarlady, - dep habarlaidy Dalanews.kz.
Buǵan deiin komitetke Boryshkerlerdiń biryńǵai tizilimindegi qazaqstandyqtar úndeý jasaǵan bolatyn. Úndeýde olar býkmekerden jeńilip qalǵan aqshalaryn qaitarýdy jáne býkmekerlerdiń ózine qatysty tekseris júrgizýdi suraǵan bolatyn.
Týrizm jáne sport ministrliginiń Oiyn biznesin jáne lotereiany retteý komiteti 2024 jylǵy 15 qarashada taratqan baspasóz relizin keibir BAQ jáne áleýmettik jeli qoldanýshylary qate túsinip, Boryshkerlerdiń biryńǵai tiziliminde (BBT) turǵan azamattar býkmekerlik keńselerge aýdarylǵan qarajattaryn qaitaryp ala alady degen jalǵan aqparat taratqanyn málimdedi.
Komitet bul málimetti resmi túrde joqqa shyǵaryp,túsinikteme berdi:
"Oiyn biznesi týraly" Zańnyń talaptary:
Zańnyń 15-baby, 1-tarmaǵynyń 3) tarmaqshasyna sáikes, BBT-da tirkelgen azamattarǵa qumar oiyndarǵa jáne bás tigýge qatysýǵa tolyq tyiym salynǵan.
Jaýapkershilik jáne baqylaý:
Eger qumar oiyndarǵa nemese bás tigýge zańsyz qatysý anyqtalsa, oiyn biznesin uiymdastyrýshylar ákimshilik jaýapkershilikke tartylady. Alaida, bul ákimshilik sharalar aýdarylǵan aqshany májbúrlep qaitarýdy qarastyrmaidy.
Boryshkerlerdiń biryńǵai tizilimindegi azamattarǵa úndeý:
Komitet BBT-da turǵan azamattardy qumar oiyndar men bás tigýge qatysýdan aýlaq bolýǵa shaqyrady jáne olardyń mundai áreketterden ózderin qorǵaý qajettigin eskertedi.
Qarajatty qaitarý máseleleri:
Komitet býkmekerlik keńselerdiń shottaryna aýdarylǵan qarajattardy qaitarýmen ainalyspaidy jáne mundai qyzmet kórsetýge ýákiletti emes.
Eger qarajatty qaitarýǵa qatysty daýlar týyndasa, azamattarǵa:
Sotqa deiingi retteý sýbektilerine júginý. Azamattyq kodekstiń 9-babyna sáikes, sotqa shaǵymdaný usynylady.
Litsenziialanǵan býkmekerlerdi tańdaý:
Azamattarǵa tek litsenziialanǵan býkmekerlik keńselerdiń resmi saittarynda tirkelýge keńes beriledi. Litsenziialanǵan keńselerdiń tizimimen myna silteme arqyly tanysýǵa bolady.
Komitet barlyq azamattardy aqparatqa muqiiat bolýǵa jáne zań buzýshylyqtardyń aldyn alýǵa shaqyrady.
