تۋريزم جانە سپورت مينيسترلىگىنىڭ ويىن بيزنەسىن جانە لوتەرەيانى رەتتەۋ كوميتەتى لوتەرەيادان جەڭىلگەن قازاقستاندىقتاردىڭ اقشاسىن قايتارۋ تۋرالى جالعان اقپارات تاراعانىن حابارلادى، - دەپ حابارلايدى Dalanews.kz.
بۇعان دەيىن كوميتەتكە بورىشكەرلەردىڭ ءبىرىڭعاي تىزىلىمىندەگى قازاقستاندىقتار ۇندەۋ جاساعان بولاتىن. ۇندەۋدە ولار بۋكمەكەردەن جەڭىلىپ قالعان اقشالارىن قايتارۋدى جانە بۋكمەكەرلەردىڭ وزىنە قاتىستى تەكسەرىس جۇرگىزۋدى سۇراعان بولاتىن.
تۋريزم جانە سپورت مينيسترلىگىنىڭ ويىن بيزنەسىن جانە لوتەرەيانى رەتتەۋ كوميتەتى 2024 جىلعى 15 قاراشادا تاراتقان باسپا ءسوز رەليزىن كەيبىر ب ا ق جانە الەۋمەتتىك جەلى قولدانۋشىلارى قاتە ءتۇسىنىپ، بورىشكەرلەردىڭ ءبىرىڭعاي تىزىلىمىندە (ببت) تۇرعان ازاماتتار بۋكمەكەرلىك كەڭسەلەرگە اۋدارىلعان قاراجاتتارىن قايتارىپ الا الادى دەگەن جالعان اقپارات تاراتقانىن مالىمدەدى.
كوميتەت بۇل مالىمەتتى رەسمي تۇردە جوققا شىعارىپ،تۇسىنىكتەمە بەردى:
"ويىن بيزنەسى تۋرالى" زاڭنىڭ تالاپتارى:
زاڭنىڭ 15-بابى، 1-تارماعىنىڭ 3) تارماقشاسىنا سايكەس، ببت-دا تىركەلگەن ازاماتتارعا قۇمار ويىندارعا جانە ءباس تىگۋگە قاتىسۋعا تولىق تىيىم سالىنعان.
جاۋاپكەرشىلىك جانە باقىلاۋ:
ەگەر قۇمار ويىندارعا نەمەسە ءباس تىگۋگە زاڭسىز قاتىسۋ انىقتالسا، ويىن بيزنەسىن ۇيىمداستىرۋشىلار اكىمشىلىك جاۋاپكەرشىلىككە تارتىلادى. الايدا، بۇل اكىمشىلىك شارالار اۋدارىلعان اقشانى ماجبۇرلەپ قايتارۋدى قاراستىرمايدى.
بورىشكەرلەردىڭ ءبىرىڭعاي تىزىلىمىندەگى ازاماتتارعا ۇندەۋ:
كوميتەت ببت-دا تۇرعان ازاماتتاردى قۇمار ويىندار مەن ءباس تىگۋگە قاتىسۋدان اۋلاق بولۋعا شاقىرادى جانە ولاردىڭ مۇنداي ارەكەتتەردەن وزدەرىن قورعاۋ قاجەتتىگىن ەسكەرتەدى.
قاراجاتتى قايتارۋ ماسەلەلەرى:
كوميتەت بۋكمەكەرلىك كەڭسەلەردىڭ شوتتارىنا اۋدارىلعان قاراجاتتاردى قايتارۋمەن اينالىسپايدى جانە مۇنداي قىزمەت كورسەتۋگە ۋاكىلەتتى ەمەس.
ەگەر قاراجاتتى قايتارۋعا قاتىستى داۋلار تۋىنداسا، ازاماتتارعا:
سوتقا دەيىنگى رەتتەۋ سۋبەكتىلەرىنە جۇگىنۋ. ازاماتتىق كودەكستىڭ 9-بابىنا سايكەس، سوتقا شاعىمدانۋ ۇسىنىلادى.
ليسەنزيالانعان بۋكمەكەرلەردى تاڭداۋ:
ازاماتتارعا تەك ليسەنزيالانعان بۋكمەكەرلىك كەڭسەلەردىڭ رەسمي سايتتارىندا تىركەلۋگە كەڭەس بەرىلەدى. ليسەنزيالانعان كەڭسەلەردىڭ تىزىمىمەن مىنا سىلتەمە ارقىلى تانىسۋعا بولادى.
كوميتەت بارلىق ازاماتتاردى اقپاراتقا مۇقيات بولۋعا جانە زاڭ بۇزۋشىلىقتاردىڭ الدىن الۋعا شاقىرادى.
