"Qazgidromet" RMK Qazaqstannyń birneshe aimaǵynda qolaisyz aýa raiy bolatynyn málimdedi. Kei óńirlerde jańbyr men qar aralas jaýyn-shashyn tússe, birqatar oblysta tuman, kóktaiǵaq bolady, dep habarlaidy Dalanews.kz.
Túrkistan oblysynyń batys, ońtústik jáne taýly aýmaqtarynda jaýyn-shashyn túsedi. Kúnniń ekinshi jartysynda nóser jaýyn jaýýy yqtimal, ońtústikte naizaǵai oinaidy. Tuman túsip, jeldiń ekpini kei jerlerde 23–28 m/s-qa deiin kúsheiedi.
Shymkentte túnde jáne keshke jańbyr jaýyp, tuman bolýy múmkin. Jel kúndiz 15–20 m/s deiin kúsheiedi. Túrkistan qalasynda da jańbyr men tuman kútiledi.
Almaty oblysynda, sondai-aq Almaty men Qonaevta tuman túsip, joldarda kóktaiǵaq bolýy yqtimal. Ońtústik jáne taýly óńirlerde jel 15–20 m/s-qa deiin kúsheiedi.
Ulytaý oblysynyń ońtústiginde kóktaiǵaq bolady. Jeldiń jyldamdyǵy 15–20 m/s, kei ýaqytta 25 m/s-qa jetýi múmkin. Osyndai jel Jezqazǵanda da kútiledi.
Qaraǵandy oblysynyń birqatar bóliginde tuman túsedi, kúndiz jel kúsheiedi.
Qyzylorda oblysynda aýa raiy kúrt qubylady: ońtústikte kóktaiǵaq, kúndiz jańbyr men qar, burqasyn kútiledi. Ortalyq jáne shyǵys aimaqtarda jaýyn-shashyn mol bolýy múmkin. Jeldiń ekpini 25 m/s-qa deiin jetedi.
Qyzylorda qalasynda da jańbyr, qar, kóktaiǵaq jáne burqasyn boljanyp otyr.
Mańǵystaý oblysynyń birqatar bóliginde kóktaiǵaq, Aqtóbe oblysynyń Muǵaljar aýdanynda jaiaý burqasyn kútiledi. Jel 15–20 m/s shamasynda.
Batys Qazaqstan, Abai, Qostanai jáne Shyǵys Qazaqstan oblystarynda túngi jáne tańǵy ýaqytta tuman túsedi. Tiisinshe Oral, Semei, Óskemen qalalarynda da kóriný nasharlaýy múmkin.
Jambyl oblysynyń ońtústik-batysy, shyǵysy jáne taýly aýmaqtarynda kóktaiǵaq pen tuman boljanyp otyr. Jel ekpini 23–28 m/s-qa deiin kúsheiýi yqtimal. Tarazda da tuman men kóktaiǵaq bolýy múmkin.
