Bul týraly ol álemjelidegi paraqshasynda jazdy dep habarlaidy Dalanews.kz.
Pashinian óziniń budan ózge amaly qalmaǵanyn aitty.
"Bul uiǵarym soǵys jaǵdaiy jáne áskeri ahýalmen jete tanys azamattarmen aqyl-keńeskennen keiin qabyldandy. Sarbazdarymyz terroristerge, NATO-daǵy sany jaǵynan ekinshi orynda turǵan memleket pen Ázirbaijan áskerine qarsy qasyq qany qalǵansha qarsylasty. Bul aitýǵa ǵana ońai sharýa", – dedi armian premeri.
NATO áskerin tilge tiek etken Pashinian osy arqyly Ázirbaijanǵa jan-jaqty qoldaý kórsetip otyrǵan Túrkiiany meńzegeni anyq. Óz kezeginde Baký da, Ankara da "urys alańynda ózge eldiń áskeri kúshi joq" dep málimdegen.
"Soǵysty toqtatý týraly mámilege keldik. Budan ózge amal-shara joq. Dál qazir nege bulai bolǵanyn ashyp aita almaimyn, sebebi bul onsyz da aýyr ahýaldy odan saiyn ushyqtyryp jiberýi múmkin ári urys alańyna tikelei áser eteri anyq", – dedi osy oraida Pashinian.
Pashinian málimdeme jasaǵan tusta narazy jurt parlamentke basyp kirgen bolatyn. Armian premeri ishke basa-kóktep kirip, parlament spikerin soqqyǵa jyqqan jurtty synǵa aldy.
"Osy arqyly maidandaǵy jaýyngerlerge kesir tigizip jatyrsyzdar", – dedi Pashinian.
Onyń pikirinshe bul jeńilý emes. Armian halqy jeńilgenin moiyndamaidy.
"Ultty uiystyrýdyń eń utymdy joly osy. Biz jeńilgen joqpyz! Táýelsizdiktiń ár jylyn elekten ótkizip, keleshekke kóz tigýimiz kerek jáne ótkenniń qateliginen sabaq alýǵa tyrysaiyq", – dedi ol.
...
Taýly Qarabaq halyqaralyq deńgeide Ázirbaijannyń jeri sanalady. Biraq ol 1990-jyldardan beri etnikalyq armiandardyń baqylaýynda.
Sovet Odaǵy ydyraǵanda Erevannyń qoldaýyna ie armian separatisteri Ázirbaijannan bólinip shyǵatynyn málimdep, arty Ázirbaijan men Armeniia arasyndaǵy soǵysqa ulasty.
Alty jylǵa sozylǵan soǵys 1994 jylǵy kelisimmen toqtady. Biraq beibitshilik tolyq ornaǵan joq, ara-arasynda qaqtyǵystar bolyp turdy. Sol ýaqyttan beri Taýly Qarabaq etnikalyq armiandardyń qolynda. Soǵys saldarynan júzdegen myń ázirbaijan bosqynǵa ainaldy.
