بۇل تۋرالى ول الەمجەلىدەگى پاراقشاسىندا جازدى دەپ حابارلايدى Dalanews.kz.
پاشينيان ءوزىنىڭ بۇدان وزگە امالى قالماعانىن ايتتى.
"بۇل ۇيعارىم سوعىس جاعدايى جانە اسكەري احۋالمەن جەتە تانىس ازاماتتارمەن اقىل-كەڭەسكەننەن كەيىن قابىلداندى. ساربازدارىمىز تەرروريستەرگە، ناتو-داعى سانى جاعىنان ەكىنشى ورىندا تۇرعان مەملەكەت پەن ءازىربايجان اسكەرىنە قارسى قاسىق قانى قالعانشا قارسىلاستى. بۇل ايتۋعا عانا وڭاي شارۋا"، – دەدى ارميان پرەمەرى.
ناتو اسكەرىن تىلگە تيەك ەتكەن پاشينيان وسى ارقىلى ءازىربايجانعا جان-جاقتى قولداۋ كورسەتىپ وتىرعان تۇركيانى مەڭزەگەنى انىق. ءوز كەزەگىندە باكۋ دا، انكارا دا "ۇرىس الاڭىندا وزگە ەلدىڭ اسكەري كۇشى جوق" دەپ مالىمدەگەن.
"سوعىستى توقتاتۋ تۋرالى مامىلەگە كەلدىك. بۇدان وزگە امال-شارا جوق. ءدال ءقازىر نەگە بۇلاي بولعانىن اشىپ ايتا المايمىن، سەبەبى بۇل ونسىز دا اۋىر احۋالدى ودان سايىن ۇشىقتىرىپ جىبەرۋى مۇمكىن ءارى ۇرىس الاڭىنا تىكەلەي اسەر ەتەرى انىق"، – دەدى وسى ورايدا پاشينيان.
پاشينيان مالىمدەمە جاساعان تۇستا نارازى جۇرت پارلامەنتكە باسىپ كىرگەن بولاتىن. ارميان پرەمەرى ىشكە باسا-كوكتەپ كىرىپ، پارلامەنت سپيكەرىن سوققىعا جىققان جۇرتتى سىنعا الدى.
"وسى ارقىلى مايدانداعى جاۋىنگەرلەرگە كەسىر تيگىزىپ جاتىرسىزدار"، – دەدى پاشينيان.
ونىڭ پىكىرىنشە بۇل جەڭىلۋ ەمەس. ارميان حالقى جەڭىلگەنىن مويىندامايدى.
"ۇلتتى ۇيىستىرۋدىڭ ەڭ ۇتىمدى جولى وسى. ءبىز جەڭىلگەن جوقپىز! تاۋەلسىزدىكتىڭ ءار جىلىن ەلەكتەن وتكىزىپ، كەلەشەككە كوز تىگۋىمىز كەرەك جانە وتكەننىڭ قاتەلىگىنەن ساباق الۋعا تىرىسايىق"، – دەدى ول.
...
تاۋلى قاراباق حالىقارالىق دەڭگەيدە ءازىربايجاننىڭ جەرى سانالادى. ءبىراق ول 1990-جىلداردان بەرى ەتنيكالىق ارميانداردىڭ باقىلاۋىندا.
سوۆەت وداعى ىدىراعاندا ەريەۆاننىڭ قولداۋىنا يە ارميان سەپاراتيستەرى ءازىربايجاننان ءبولىنىپ شىعاتىنىن مالىمدەپ، ارتى ءازىربايجان مەن ارمەنيا اراسىنداعى سوعىسقا ۇلاستى.
التى جىلعا سوزىلعان سوعىس 1994 جىلعى كەلىسىممەن توقتادى. ءبىراق بەيبىتشىلىك تولىق ورناعان جوق، ارا-اراسىندا قاقتىعىستار بولىپ تۇردى. سول ۋاقىتتان بەرى تاۋلى قاراباق ەتنيكالىق ارميانداردىڭ قولىندا. سوعىس سالدارىنان جۇزدەگەن مىڭ ءازىربايجان بوسقىنعا اينالدى.
