Memleket basshysy Qasym-Jomart Toqaev memlekettik apparat jumysyn jetildirý sharalary týraly jarlyqtaryna ózgerister engizdi, dep habarlaidy Dalanews.kz.
Budan bylai Qazaqstan Respýblikasy Prezidentiniń nemese Prezident Ákimshiligi basshylyǵynyń tapsyrmalaryn oryndamaǵan saiasi memlekettik qyzmetshige tártiptik jaza qoldanylady.
2000 jylǵy Prezident jarlyǵyna sáikes, tártiptik jaza kelesi jaǵdailarda qarastyrylǵan:
- qyzmetshilerdiń ózderine júktelgen mindetterin zańsyz nemese durys oryndamaýy;
- laýazymdyq ókilettikterin asyra paidalanýy;
- memlekettik jáne eńbek tártibin buzýy;
- memlekettik qyzmetshilerdiń qyzmettik etika erejelerin buzýy;
- tártiptik jaza túrinde jazalanatyn sybailas jemqorlyq quqyqbuzýshylyq jasaýy;
- memlekettik qyzmet týraly zańda kórsetilgen shekteýlerdi nemese memlekettik qyzmetshilerdiń mindetterin oryndamaýy.
Budan bólek, qujatqa sáikes, ortalyq jáne jergilikti memlekettik organdarǵa memlekettik biýdjetten qarjylandyrylatyn uiymdardyń kadrlyq protsesterin “Biryńǵai kadrlyq júie” aqparattyq júiesi negizinde avtomattandyrýdy 2025 jyldyń 31 jeltoqsanyna deiin qamtamasyz etý tapsyryldy.
Taǵy bir tolyqtyrýda memlekettik organdardyń shtat sanyn kóbeitý tek bos oryndardy Úkimet aiqyndaǵan tártipke sáikes qaita bólý arqyly júzege asyrylatyny aitylǵan. Degenmen, kelesi jaǵdailar buǵan kirmeidi:
-
Qazaqstan Respýblikasy Prezidenti engizgen tótenshe jaǵdailarǵa bailanysty áreket etý qajettiligi;
-
ortalyq memlekettik organdar nemese olardyń vedomstvolaryn qurý;
-
Qazaqstan Respýblikasynyń “Qazaqstan Respýblikasynyń ákimshilik-aýmaqtyq qurylysy týraly” zańyna sáikes ákimshilik-aýmaqtyq qurylymdy ózgertý;
-
Prezident tapsyrmasy boiynsha ózge jaǵdailar.
Sonymen qatar Prezident Ákimshiligi, Úkimet apparaty, Parlament palatalarynyń apparattary, Sot ákimshiligi, quqyq qorǵaý organdary, arnaiy memlekettik organdar, azamattyq qorǵaý organdary, Qorǵanys ministrligi, sondai-aq shtat sany 100 birlikten az memlekettik organdardyń bos shtattyq birlikteri ózara qaita bólinbeidi.
eGov portalynyń málimetinshe, tártiptik jazanyń kelesi túrleri bar:
- eskertý;
- sógis;
- qatań sógis;
- qyzmetke tolyq sáikes emestigi týraly eskertý;
- laýazymyn tómendetý;
- atqaryp otyrǵan laýazymynan bosatý.
Tártiptik jaza qoldanýdyń negizi – ákimshilik memlekettik qyzmetshiniń tártiptik teris qylyq jasaýy.
