مەملەكەت باسشىسى قاسىم-جومارت توقايەۆ مەملەكەتتىك اپپارات جۇمىسىن جەتىلدىرۋ شارالارى تۋرالى جارلىقتارىنا وزگەرىستەر ەنگىزدى، دەپ حابارلايدى Dalanews.kz.
بۇدان بىلاي قازاقستان رەسپۋبليكاسى پرەزيدەنتىنىڭ نەمەسە پرەزيدەنت اكىمشىلىگى باسشىلىعىنىڭ تاپسىرمالارىن ورىنداماعان ساياسي مەملەكەتتىك قىزمەتشىگە تارتىپتىك جازا قولدانىلادى.
2000 جىلعى پرەزيدەنت جارلىعىنا سايكەس، تارتىپتىك جازا كەلەسى جاعدايلاردا قاراستىرىلعان:
- قىزمەتشىلەردىڭ وزدەرىنە جۇكتەلگەن مىندەتتەرىن زاڭسىز نەمەسە دۇرىس ورىنداماۋى؛
- لاۋازىمدىق وكىلەتتىكتەرىن اسىرا پايدالانۋى؛
- مەملەكەتتىك جانە ەڭبەك ءتارتىبىن بۇزۋى؛
- مەملەكەتتىك قىزمەتشىلەردىڭ قىزمەتتىك ەتيكا ەرەجەلەرىن بۇزۋى؛
- تارتىپتىك جازا تۇرىندە جازالاناتىن سىبايلاس جەمقورلىق قۇقىقبۇزۋشىلىق جاساۋى؛
- مەملەكەتتىك قىزمەت تۋرالى زاڭدا كورسەتىلگەن شەكتەۋلەردى نەمەسە مەملەكەتتىك قىزمەتشىلەردىڭ مىندەتتەرىن ورىنداماۋى.
بۇدان بولەك، قۇجاتقا سايكەس، ورتالىق جانە جەرگىلىكتى مەملەكەتتىك ورگاندارعا مەملەكەتتىك بيۋدجەتتەن قارجىلاندىرىلاتىن ۇيىمداردىڭ كادرلىق پروسەستەرىن “ءبىرىڭعاي كادرلىق جۇيە” اقپاراتتىق جۇيەسى نەگىزىندە اۆتوماتتاندىرۋدى 2025 جىلدىڭ 31 جەلتوقسانىنا دەيىن قامتاماسىز ەتۋ تاپسىرىلدى.
تاعى ءبىر تولىقتىرۋدا مەملەكەتتىك ورگانداردىڭ شتات سانىن كوبەيتۋ تەك بوس ورىنداردى ۇكىمەت ايقىنداعان تارتىپكە سايكەس قايتا ءبولۋ ارقىلى جۇزەگە اسىرىلاتىنى ايتىلعان. دەگەنمەن، كەلەسى جاعدايلار بۇعان كىرمەيدى:
-
قازاقستان رەسپۋبليكاسى پرەزيدەنتى ەنگىزگەن توتەنشە جاعدايلارعا بايلانىستى ارەكەت ەتۋ قاجەتتىلىگى؛
-
ورتالىق مەملەكەتتىك ورگاندار نەمەسە ولاردىڭ ۆەدومستۆولارىن قۇرۋ؛
-
قازاقستان رەسپۋبليكاسىنىڭ “قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى” زاڭىنا سايكەس اكىمشىلىك-اۋماقتىق قۇرىلىمدى وزگەرتۋ؛
-
پرەزيدەنت تاپسىرماسى بويىنشا وزگە جاعدايلار.
سونىمەن قاتار پرەزيدەنت اكىمشىلىگى، ۇكىمەت اپپاراتى، پارلامەنت پالاتالارىنىڭ اپپاراتتارى، سوت اكىمشىلىگى، قۇقىق قورعاۋ ورگاندارى، ارنايى مەملەكەتتىك ورگاندار، ازاماتتىق قورعاۋ ورگاندارى، قورعانىس مينيسترلىگى، سونداي-اق شتات سانى 100 بىرلىكتەن از مەملەكەتتىك ورگانداردىڭ بوس شتاتتىق بىرلىكتەرى ءوزارا قايتا بولىنبەيدى.
eGov پورتالىنىڭ مالىمەتىنشە، تارتىپتىك جازانىڭ كەلەسى تۇرلەرى بار:
- ەسكەرتۋ؛
- سوگىس؛
- قاتاڭ سوگىس؛
- قىزمەتكە تولىق سايكەس ەمەستىگى تۋرالى ەسكەرتۋ؛
- لاۋازىمىن تومەندەتۋ؛
- اتقارىپ وتىرعان لاۋازىمىنان بوساتۋ.
تارتىپتىك جازا قولدانۋدىڭ نەگىزى – اكىمشىلىك مەملەكەتتىك قىزمەتشىنىڭ تارتىپتىك تەرىس قىلىق جاساۋى.
